Борис Бекер испорачал ултиматум до Новак Ѓоковиќ во врска со продолжување на меѓусебната соработка и во 2017 година. Според медиуми во Германија, тој побарал помала улога за Пепе Имас кој во стручниот штаб на српскиот тенисер фигурира како ментален тренер. Поранешниот германски ас во тоа, наводно, ја има поддршката од вториот тренер на Ѓоковиќ, Марјан Вајда со кого работи од средината на 2006 година.
Последните недели се шпекулираше со разделба на Бекер и вториот светски рекет во светот на крајот на годината, но дел од медиумите очекуваат дека Германецот ќе добие нова понуда за соработка. Дали ќе продолжат заедно наводно зависи од споменатиот услов за Имас.
Ѓоковиќ го загуби првото место на АТП листата во финишот на 2016 година. Тронот го презеде Енди Мареј, а Пепе Имас излезе на површина на Мастерсот во Париз, настан на кој, пак, ги немаше Бекер и Вајда.