Режимот не смее да формира влада, порача денеска лидерот на СДСМ, Зоран Заев. Тој им порача на сите политички партии освен на ВМРО-ДПМНЕ да не им текне да ја поништат јасно изразената волја на граѓаните со формирање на коалиција со Никола Груевски.
„Постојат разлики во резултатите од записниците на избирачките места и резултатите што ги објави ДИК за истите тие избирачки места. Само ако се корегираат овие бројки, СДСМ има поголем број мандати во И.Е 6, со што соодносот на добиени мандати е 50 : 50. Поради констатираните нерегуларности, за коишто известија и набљудувачите на изборите, ќе поднесеме и приговори, така што вистинската слика за бројот на добиени мандати ќе ја дадат конечните резултати.
Независно од овие пребројувања што се во тек, едно е кристално јасно. Граѓаните се изјаснија дека повеќе нема место за политичари како Никола Груевски. Сакаат добар живот, сакаат независни институции, сакаат праведна и правична држава, сакаат Македонија за сите граѓани и тоа ќе се случи“, рече Заев.
Тој потенцираше дека тие ќе поднесат приговори, така што вистинската слика ќе ја дадат конечните резултати по преговорите, а затоа повика будно да се следи работата на Државната изборна комисија кога бројките ќе станат официјални.
Лидерот на опозицијата додаде дека ова е историска победа на граѓаните на парламентарните избори.
„Заедно поразивме режим, граѓаните избраа живот во Македонија. Сакам да ја почитуваме мнозинската волја на граѓаните, наспроти режимот. Мнозинството граѓани избраа промени. Ја обединивме етничка Македонија“, рече Заев
Меѓу другото, лидерот на СДСМ, коментирајќи ја фотографијата која ја разбрани јавноста на социјалните мрежи, каде наставничка од Битола носи крст со името и презимето на Зоран Заев на постизборно славје, рече дека слободата ќе ја почувствуваат сите граѓани кои биле заробени и уценувани од Никола Груевски.