Регионална фудбалска лига под покровителство на Европската фудбалска асоцијација (УЕФА) ќе нема. Барем не сега што не значи дека не може да ја има во иднина. Претседателот Александар Чеферин негираше дека во моментот се работи на подготовка на такво нешто ниту пак е донесена некаква одлука во Нион во тој контекст. Но, истовреме не отфрла можност за разгледување на идејата доколку како официјален предлог дојде од некоја од фудбалките федерации во регионот или биде поднесена како заедничка заложба.
„Нема вистина неодамнешните тврдења за формирање на Балканска лига. Во УЕФА не е донесена никаква одлука за создавање на такво првенство за разлика од написите во медиумите во изминатиот период“, рече Чеферин.
Словенецот кој на функцијата го наследи Мишел Платини нагласи дека националните првенства се основа на европскиот фудбал. Тој, сепак, не исклучува можност за расправање по тоа прашање ако дојде како официјално барање поднесено од некоја од шест федерации на просторите на поранешна Југославија и Унгарија.
„Иако транснационалните шампионати се спомнати во некои случаи, сепак, конкретни предлози нема. Секоја тава идеја би била разгледана од УЕФА доколку иницијативата ја поднесат национални федерации“, пишува во веста на www.uefa.com.
Медиумите веќе две недели се преокупирани со темата регионална фудбалска лига, проект што е интерес за сите и што доби публицитет, но и различни реакции во секоја од земјите што произлегоа од СФРЈ. Некои напишаа, па и најавија дека проектот би можел да стартува во септември во 2018 година и учесници во него би биле екипи што ќе немаат обврски во фазата ппо групи со Лигата на шампиони и Лига Европа.
Официјални лица од седум држави (Македонија, Црна Гора, Србија, БиХ, Хрватска, Словенија и Унгарија) неодамна се сретнаа во Загреб на состанок на заедничка иницијатива пришто главна тема беше регионална лига, но без конкретни заклучоци.
Македонија беше претставена од Зоран Стратев, координатор на младински селекции во ФФМ и Ѓоре Јовановски, претседател на тренерската организација при Куќата на фудбалот. Она што го потврдија по враќање во Скопје е начелнно изразената согласност од сите. Иако и самите истакнаа дека е далеку од реализација, сепак, ги споделија позитивнио пристап и размислувањата за заеднички проект што во прво време би опфатил лига за фудбалери до 16 години и, можеби, во женски фудбал. Сето тоа би било во функција на подготвување на терен за Лига со сениорски клубови во блиска иднина.