Македонскиот женски ракометен првак Вардар остана непоразен и во осмиот настап во Лигата на шампиони во оваа сезона. Совладан е Мец со 23:21 на многу потежок начин одошто се очекуваше и помислуваше. Бодовите на крајот и висеа, но, сепак, останаа во СЦ „Јане Сандански“. Вардарки се први на табелата во групата 1 со 11 бода, два повеќе од унгарски Ференцварош и во наредното коло ќе гостуваат во Германија кај екипата на Тирингер.
Сања Дамњановиќ беше најефикасна во мечот со пет гола, четири за победничката екипа постигнаа Александра Лакрабер. Словенечката репрезентативка Ана Грос реализира пет за гостинките од Франција, по четири пати меѓу стрелците се впишаа Србинката Слаѓана Поп-Лазиќ и Германката Ксенија Смитс.
Французинките ја потврдија дефанзивната репутација со која допатуваа во Скопје. Нивната одлична игра во одбрана го запре најдобриот напад во ЛШ на само 23 гола. Во втората половина од воведните 30 минути и во најголем дел од второто полувреме беа во подредена улога. И покрај тоа се најдоа во позиција да бидат втора екипа по Ференцварош што ќе замине непоразена од СЦ „Јане Сандански“ во што, за среќа на „црвено-црните“, не успеаја.
Вардарки имаа пет гола предност во неколку наврати меѓутоа и осцилациите што се пројавија придонесоа Мец да се врати во игра за бод. Во завршницата се влезе со 22:21. Лакрабер не реализира пенал на 30 секунди до крајот, а Мец напад за израмнување. Точка на неизвесноста стави Јованка Радичевиќ кој од сопствената половина го погоди празниот противнички гол за конечни 23:21 и седма победа во низа.
ЖРК Вардар го заврши мечот без Андреа Пенезчиќ. Репрезентативката на Хрватска се повреди во 52 минута, го напушти теренот и не се врати повеќе во игра.
ЖРК Вардар – Мец 23:21 (13:11)
Сала: СЦ „Јане Сандански“. Гледачи: 2.500. Судии: Игор Ковалчик и Алексе Ковалчук од Молдавија.
ЖРК Вардар: Лејно, Песоа, Суслина, Радичевиќ 3, Кликовац, Херем, Мавсар 2, Дамњановиќ 5, Лазович, Алтхаус 3, Пенезиќ 3, Човиќ, Лакрабер 4, Хмирова 2, Лекиќ 1, Ристовска. Тренер: Давид Дејвис.
Седмерци: 5/6. Исклучувања: 6 минути. Технички грешки: 11.
Мец: Глосер 1, Рајчиќ, Едвиге, Грос 5, Заади 1, Канор 1, Ноканди, Хорачек 1, Поп-Лазиќ 4, Смитс 4, Сајка 1, Мобо, Лусијано 3, Остин, Бурле. Тренер: Емануел Мајонаде.
Седмерци: 1/3. Исклучувања: 6 минути. Технички грешки: 6.
Лига на шампиони
Група 1, 2 коло
ЖРК Вардар – Мец 23:21
Астраханочка – Будуќност 21:34
Ференцварош – Тирингер 32:24
Табела: ЖРК Вардар 11, Ференцварош 9, Будуќност 8, Мец 4, Тирингер 4, Астраханочка 0.