Лидерот на Демократската Унија за Интеграција (ДУИ), Али Ахмети апелира до најголемата опозициска партија да продолжи со учество во работните групи при Министерството за правда во врска со Законот за јавно обвинителство со кој се решава и судбината на Специјалното Јавно Обвинителство (СЈО).
„Апелирам до опозицијата да не се повлекува од дијалогот и да се постигне согласност за доброто на државата“, изјави Ахмети, одговарајќи на новинарски прашања пред одбележувањето на 20 години од НАТО интервенцијата во Косово во организација на ДУИ, на кое присуствуваа претседателот на Собранието Талат Џафери и вицепремиерот Бујар Османи, како и поглаварот на Исламската Верска Заедница (ИВЗ) реисот ул улема Сулејман Реџепи.
Со став за дијалогот со опозицијата излезе и СДСМ.
„Од она што имавме прилика да го слушнавме од работните групи е дека нема никакво поместување во ставовите. Знаете дека позицијата на СДСМ е јасна, недвосмислена и принципиелна. Тоа значи дека нема да биде променлива, затоа што тоа е во согласност со препораките од Европската Унија, а тоа е обезбедување на вистинска правна држава. За жал најголемата опозициска партија ВМРО ДПМНЕ не го поддржува целиот тој процес“, изјави денеска Костадинов.
На прашањето што ќе прават доколку не се постигне договор со ВМРО-ДПМНЕ нагласи дека постои собраниска процедура, во рамки на која пратениците одлучуваат согласно нивното сопствено убедување.
„Верувам дека сите мои колеги во Собранието како пратеници имаат навистина искрени намери воспоставувањето на правната држава во Република Северна Македонија да стане пракса. Тоа ние треба да го покажеме“, додаде тој.
Во врска со тоа дали имаат почнато разговори со пратениците за добивање двотретинско мнозинство, Костадинов истакна дека СДСМ е партија која му дава шанса на дијалогот.
„Ред е да разговараме со најголемата опозициска партија. Ќе видиме каков ќе биде епилогот од тие средби за потоа целиот тој разговор помине во Собранието“, истакна Костадинов.
Работните групи на власта и на опозицијата во петокот не успеаја да се усогласат околу Законот за јавното обвинителство.
Министерката Дескоска по состанокот истакна дека ВМРО-ДПМНЕ го прекршила првиот договор што го направиле – на состанокот во петокот да имаат доставени конкретни амандмани со кои би се подобрил законскиот текст, доколку за тоа има простор.
„Наместо тоа, добивме еден материјал во кој наведоа меѓународни документи што наводно не биле имплементирани. Сите документи што се наведени во она што го достави ВМРО-ДПМНЕ, а кои се однесуваат на ЈО се имплементирани во овој закон, дел се имплементирани во Законот за кривична постапка, а дел се имплементирани во Кодексот на јавните обвинители. Има и еден документ што тие го наведуваат и воопшто не се однесува на ЈО, туку се однесува на јавни службеници и во него децидно стои дека не се однесува на какви било органи во рамките на судството“, изјави Дескоска.
Антонио Милошоски од ВМРО-ДПМНЕ по состанокот истакна дека на средбата биле наброени три точки за имплементација на 15 резолуции што треба да бидат прифатени во овој закон, а, кои, како што рече, се по меѓународни стандарди.
Опозициската ВМРО-ДПМНЕ во четвртокот до Министерството за правда достави три принципи на кои ќе инсистираат за имплементација во Предлог законот за Jавно обвинителство – целосна имплементација на меѓународните стандарди што се однесуваат на Обвинителството и на обвинителите, заштита на основните човекови права и независност, неутралност, отчетност, ефикасност и ефективност во борбата против криминалот.
Владејачкото мнозинство очекува законот за јавното обвинителство да биде донесен до крајот на март, односно пред почетокот на кампањата за претседатеските избори. Тоа е и еден од условите за отворање на преговорите со ЕУ во јуни.