Аларм: Скопје веќе го надмина годишниот ЕУ лимит за аерозагадување

Скопје и оваа ги надмина годишните дозволени ЕУ граници за аерозагадување уште во февруари, што е показател дека еколошката и здравствена голгота на Скопјани продолжува и во 2018 година, констатираат од Скопје Смог Аларм, граѓанска заедница на еко-активисти. 

Тие укажуваат дека во Европската унија, дозволената граница за концентрации на ПМ10 честички просечени во 24 часа е 50 µg/m3, додека дозволениот број на надминувања на лимитите е 35 денови во една календарска година.

-На 21 февруари 2018, овие ЕУ лимити се надминати на сите мерни станици во Скопје, освен Миладиновци, Општина Илинден, велат од Скопје Смог Аларм.

Тие податоците за вкупниот број на надминувања на 24 часовните гранични вредности (50 µg/m3) за ПМ10 честичките (броено во календарски денови),  на секое мерно место во Скопје за тековната година, заклучно со 21.02.2018, ги сместиле во следната табела:

-Потсетуваме дека Светска Банка (2015) проценува дека во Македонија од загадениот воздух годишно гинат 1,350 граѓани,  додека Европската агенција за животна средина (2017) проценува дека годишно има до 3,000 смртни случаи заради аерозагадувањето.  Тоа  значи дека секоја година ни се случува еколошки геноцид, т.е. екоцид, велат од Скопје Смог Аларм.

Тие апелираат локалните и централните власти да преземат  итни и одржливи мерки за подобрување на воздухот во Скопје и низ цела Македонија.

-Воздухот во Скопје не смее да се користи како канализација на тешката индустрија и градежната индустрија.  Мерки како дводневен бесплатен превоз се премали за еден од најзагадените градови во светот. Како за пример, Германија планира да воведе целосно бесплатен јавен превоз во пет најзагадени градови. Исто така, Кина ја ангажира армијата за да засади дрвја, најмногу во околината на главниот град Пекинг, и привремено затвори голем број на фабрики со цел да се намали загадувањето. Париз неколку пати воведе „ден без автомобили“ во центарот на градот, велат екологистите.