Албанскиот претседател Илир Мета повика на воздржаност и апелира да се избегнат конфронтации како реакција на ескалација на ситуацијата на масовниот протест на опозицијата пред Парламентот во Тирана.
„Претседателот на Републиката со загриженост ја следи ситуацијата. Тој апелира на мирни протести и воздржаност и ги повика сите учесници да се воздржат од провокации и да избегнат конфронтации“, се наведува во апелот на Мета од Баку за време на неговата официјална посета на Азербејџан.
Мета наиде на критики од аналитичарите кои му забележуваат дека на секој масовен протест во Тирана тој е надвор од земјата. Притоа го нагласуваат неговото актуелно службено патување во Азербејџан додека на претходниот протест беше во Црна Гора.
Ситуацијата пред албанскиот Парламент и понатаму е тензична. Медиумите јавуваат дека неколку полицајци се повредени со тврди предмети, но јавуваат за повредени и меѓу демонстрантите.