Секако дека следам што се случува, но не би сакал да се мешам, мислам дека и Македонија и Албанија заслужија преговори со Европска Унија и исполнување на се што бараат, порача претседателот на Србија Александар Вучиќ во вестите на ТВ Сител.
„Не можам да кажам дали предлогот е добар или лош. И Бриселскиот договор не го сакаа тогаш кај нас во Србија, па ете сега најмногу се потпираме на него. По него двојно ги покачивме нашите плати, добивме огромен број инвестиции. Дали е се сјајно и убаво во предлогот, секако дека не е. Ништо не е лесно и убаво. Но што е алтернативата? Само сакам да размислат граѓаните, да не гледаат преку емоции, на никој не му се потребни судири на народот со полицијата. Само нека анализираат и за добрите и лошите работи”, изјави Вучиќ.
Српскиот претседател Александар Вучиќ, во гостувањето на ТВ Сител, зборуваше и за економската состојба во Србија, по отворањето на преговорите.
„Ние ги отворивме преговорите за членство во Европската Унија, но после тоа ние повеќе од дупло ги покачивме нашите плати. Ние имавме плати на ниво од Северна Македонија, денес платите кај нас се 640 евра просечна, а наскоро и 720 евра. Во Белград наскоро платите ќе одат над 990 евра. Веќе во јануари месец добивме огромен број на инвестиции, 62% вкупно од инвестициите од Западен Балкан. Нас, отворањето на преговорите со ЕУ многу ни помогна“, рече Вучиќ.
Како што вели тој, во Србија имаме искрен пријател, само да се напредува. И ако отвориме преговори, ќе ја имаме нивната поддршка.
“Гледајте да ви оди земјата напред. Добро е да се биде на европски пат, тоа е важно”. Вучиќ упати порака до граѓаните во нашата земја, со апел за добрососедство и пријателство.
„Јас имам нешто кое што сакам да им го кажам на луѓето. Србија не сака ништо од Северна Македонија. Ние ве доживуваме вас како наши браќа, нам не ни треба територија од Северна Македонија, нам не ни треба јазикот, го признаваме македонскиот јазик. Нам не ни треба црквата, ја признаваме македонската црква. Нам не ни треба ама баш ништо, освен пријателство и добри соседски односи. Тоа е единственото што ни е потребно“, рече Вучиќ.
Тој уште еднаш порача македонските граѓани со помалку емоции да пристапат кон целата ситуација. „Не е крај на светот ни за едната опција ни за другата. Тоа е тактички потег”, порача претседателот на Србија Александар Вучиќ.
(М.Т.)