Вториот работен ден со фудбалската репрезентација на Македонија за септемвриските дуели во квалификациите за Светското првенство во 2018 година почна со главоболки за селекторот Игор Ангеловски. Принуден беше да упати дополнителен повик што го адресира до Мите Цикарски на местото на Ферхан Хасани. Капитенот на Шкендија го пропушта гостувањето во Израел во сабота и мечот со Албанија на 5 септември во Струмица поради повреда што била констатирана и од лекарскиот тим во националниот тим, па изборот за замена падна на играчот на кипарски Етникос.
Сите останати кои се најдоа на првичниот список на Ангеловски се тука и без проблеми ги извршуваат поставените задачи на тренинзите. Она што го посакуваат се добри подготовки овие денови во Скопје и повеќе среќа во Хаифа среде викендот.
„Нема да биде лесно што, пак, не значи дека трите бода не се наша цел. Младите фудбалери и даваат нова енергија и свежина на оваа репрезентација која несомнено поседува квалитет. Важно е да одиграме добро, да дадеме максимум, а најважно е Македонија да победи и сеедно е притоа кој би постигнал гол“, коментира Езџан Алиоски кој на асистенцијата во мечот со Сандерленд во англискиот Чемпионшип надоврза и погодок против Нотингем Форест во саботата.
Стефан Спировски, кој оваа недела стана член на Ференцварош, се надева на добро издание на Македонија во седмиот настап во циклусот за мундијалот во Русија и среќата да биде сојузник на стадионот „Сами Офер“ во сабота од 20,45 часот.
„Само да ја пренесеме формата и ефикасноста од клупски план на репрезентативен. Ако успееме ќе биде од големо значење за нас. Убеден сум дека секој што ќе настапи викендот ќе возврати со максимално залагање, борбеност и пожртвуваност. Се надевам на позитивен резултат. Одиме чекор по чекор, фокусирани сме на Израел, а по него ќе размислуваме на Албанија“, вели Спировски.
Македонија е претпоследна во групата Г со три бода од шест натпревари. Покрај претстојните дуели со Израел и Албанија, репрезентативците ги очекуваат уште два до крајот на квалификациите. На 6 октомври ќе гостуваат на Италија во Торино, три дена подоцна, во последното коло, ќе бидат домаќини на Лихтенштајн.