Бод ќе заврши голема работа, трите ќе бидат како бинго за македонската фудбалска репрезентација во вечерашното гостување во Словенија во квалификациите за Европското првенство во 2020 година. Мечот се игра на стадионот „Стожице“ во Љубљана со почеток во 20.45 ч. и во него се влегува со верба во нова добра претстава и со желба за позитивен резултат. „Црвено-жолтите“ ќе истрчаат на терен со полна самодоверба по триумфот на Летонија со 3:1, но и како лидери во групата Г, „змајчеки“, пак, со реми по настапот против Израел во Хаифа (1:1).
„Нема да менуваме ништо во пристапот. Ќе играме офанзивно бидејќи само така можеме до резултат. Словенците имаат квалитетни поединци додека Македонија има силен колектив и се надевам дека договорот за настап ќе биде пресликан и на терен“, порачува Алиоски, стрелец и асистент во победата над Летонците во четвртокот, кој верува дека националниот тим вечерва може да остане непоразен и во словенечката престолнина.
Македонската и словенечката фудбалска репрезентација за првпат во историјата ќе играат за бодови. Сите четири досегашни беа од пријателски карактер од кои „црвено-жолтите“ добија три (4:1 во Крањ во 1993 година, 2:0 во Скопје во 1994 година и 3:2, исто така, во Скопје во 2012 година), а еден меч (последниот во Копер во 2016 година) им припадна на вечерашните домаќини со 1:0.
Во Г конкуренцијата денеска уште два натпревара. Од 18 часот во Хаифа, Израел ќе биде домаќин на Австрија, а од 20.45 часот во Варшава, Полска ќе игра со Летонија.
Квалификациите за македонскоот национален тим ќе продолжат во јуни со две средби на домашен терен. На националната арена „Филип Втори“ најпрво ќе гостува Полска (7 јуни), а потоа и Австрија (10 јуни) што ќе биде одлична можност со што повеќе бодови да се дочекаат септемвриските гостувања во Израел и во Летонија.