„Нема причина за менување во тимот што победува“, нагласи селекторот Игор Ангеловски при објавување на репрезентативниот список за претстојниот пријателски меч на Македонија против Норвешка на 11 ноември во Скопје. Во тој контекст и очекувањата за продолжување на позитивниот резултатски тренд во 2017 година за дополнителен напредок на ранг листата на ФИФА.
„Сметам дека нема потреба од менување на она што добро функционираше во квалификациите за Светското првенство. Затоа и се решив за ваков избор. Пред нас е дуел со селекција против која немаме победа во минатото. Норвежаните негуваат типично скандинавски, агресивно и со многу контакти, а ги предводи Ларс Лагербег, човекот што направи вистинско чудо со репрезентацијата на Исланд. Верувам дека одлично ќе одговориме на предизвикот и ќе продолжиме со позитивниот тренд на резултати“, истакна предводникот на националниот тим.
Ангеловски повика 21 играч за тестот со Норвешка. Меѓу нив и Стефан Ристовски кој одигра одлични 90 минути за Спортинг Лисабон против Јувентус во Лигата на шампиони и вардарците Висар Муслиу и Дарко Велковски кои се враќаат во тренажен процес по здобиените повреди.
„Ристовски имаше импресивен настап за Спортинг против Јуве. Беше заменет во продолжението на средбата, но не поради повреда туку поради грчеви. Ќе биде подготвен за дуелот со Норвешка“, нагласи Ангеловски.
Собирот на најдобрите македонски фудбалери е закажан на 7 ноември во Скопје. Македонија досега одигра три натпревари против Норвешка од кои два беа во квалификациите за СП 2010. Дуелот во Скопје заврши без голови, Норвежаните славеа во реваншот со 2:1. Стрелец на единствениот гол за „црвено-жолтите“ на стадионот „Улевал“ во Осло беше Бобан Грнчаров во 79 минута. Последната меѓусебна пресметка беше од пријателски карактер во 2013 година и заврши во корист на Норвешка со 2:0.
Список на фудбалери на Македонија за претстојниот пријателски меч против Норвешка
Голмани
Столе Димитриевски (Гимнастик/Шпанија)
Давид Митов Нилсон (Норчепинг/Шведска)
Одбрана
Стефан Ристовски (Спортинг Лисабон/Португалија)
Кире Ристевски (Вашаш/Унгарија)
Ѓоко Зајков (Шарлроа/Белгија)
Дарко Велковски (Вардар)
Висар Муслиу (Вардар)
Кристијан Тошевски (Пелистер)
Среден ред
Енис Барди (Леванте/Шпанија)
Езџан Алиоски (Лидс јунајтед/Англија)
Аријан Адеми (Динамо Загреб/Хрватска)
Стефан Спировски (Ференцварош/Унгарија)
Никола Ѓорѓев (Твенте/Холандија)
Ферхан Хасани (Шкендија)
Бобан Николов (Вардар)
Љупчо Дориев (Академија Пандев)
Напад
Горан Пандев (Џенова/Италија)
Илија Несторовски (Палермо/Италија)
Александар Трајковски (Палермо/Италија)
Иван Тричковски (АЕК Ларнака/Кипар)