Новата анкета на јавното мислење во Северна Македонија што ја спроведе Националниот демократски институт (НДИ) пред официјалниот почеток на кампањата за предвремените парламентарни избори на 15 јули покажува дека економскиот развој, борбата против корупцијата и грижата за јавното здравје се приоритети за гласачите.
Од почетокот на епидемијата на Ковид-19 во март, општиот впечаток на јавноста е попесимистичен, при што 44 проценти од испитаниците велат дека земјата се движи во погрешна насока за разлика од претходната анкета (март 2020 година) во која 33 посто од испитаниците се изјасниле дека земјата се движи во погрешна насока. Економијата и животниот стандард воопшто, а особено вработувањето се најважни за една третина од испитаниците.
Приоритет, пак, за друга третина од анкетираните е борбата со корупцијата и останатите реформи во областа на владеењето на правото. Скоро една четвртина вели дека Ковид-19 е нивната најголема грижа.
„Анкетата го отсликува основниот континуитет на јавното чувство уште пред епидемијата со Ковид-19, особено за економскиот развој и антикорупциските реформи“, истакна Роберт Скот Хејзлет, директор на НДИ-Северна Македонија.
Гласачите, вели тој, аплаудираат за членството во НАТО и најавата за почеток на преговори за членство во Европската Унија (ЕУ), но економските и здравствените грижи кои преовладуваат ги обликуваат нивните приоритети во однос на овие избори.
„Чувствата на гласачите за двете водечки партии/коалиции – СДСМ/Беса и на ВМРО-ДПНМЕ во голема мера остануваат непроменети од почетокот на епидемијата на Ковид-19, со блиски конкурентни нивоа на јавна поддршка (девет проценти од гласачите се неопределени)“, стои во истражувањето.
Гласачите во Северна Македонија точно ги знаат своите приоритети што ќе ги одведат до гласачките кутии. При тесни избори, тие го проценуваат политичкото лидерство и партиските политики поврзани со владеењето на правото и економијата кои им се најважни, истакна Роберт Бенџамин, директор на НДИ-Централна и Источна Европа.
Речиси седум од 10 испитаници велат дека веројатно ќе гласаат. Четириесет и еден процент од сите испитаници изразуваат загриженост во врска со демократските стандарди на изборите, а 46 проценти изразуваат загриженост во врска со здравствените мерки за заштита, но за голем дел од нив оваа загриженост е намалена поради најавените протоколи на Министерството за здравство. Педесет и шест проценти се многу или донекаде загрижени за тоа дека Ковид-19 или дезинформациите во врска со изборите можат негативно да влијаат на изборниот процес.
„Чувството на јавноста е стабилно во однос на Преспанскиот договор од 2018 година, при што 58 проценти го поддржуваат или веруваат дека бил потребен. Една третина е против договорот. Големо мнозинство, речиси 75 посто, го одобрува членството во НАТО и влезот во Европската Унија“, се вели во истражувањето.
НДИ ја спроведе анкетата на јавното мислење на терен, преку интервјуа лице в лице, од 12 до 21 јуни на национален репрезентативен примерок од 1.213 испитаници кои имаат над 18 години. Анкетата е со маргина на грешка од +/- 2.8 проценти и 95 проценти стапка на доверба. Истражувањето и анализата биле спроведени од „Тим Институт“ и Starr Opinion Research во име на НДИ. Податоците од анкетата не го предвидуваат изборниот резултат.