Перо Антиќ имаше скромно поентерско издание во Атина, но и солидно во играта под обрачите против Панатинаикос во меч од 12 коло во кошаркарската Евролига. „Зелените“ го совладаа Фенербахче со 81:70 (по четвртини: 23:14, 18:23, 20:15, 20:18) за нивна седма победа во сезоната и четврти пораз за тимот од Истанбул.
Македонскиот интернационалец одигра 23 минути во олимписката арена во Атина, период во кој погоди по еднаш од игра и од линијата за слободни фрлања и промаши четири обиди за тројка. Но, затоа свој ефект имаше во рекетот. Од тимските, вкупно, 40 скока, седум беа негови (2 офанзивни и пет дефанзивни). Фенербахче во наредното коло ќе биде домаќин на Дарушафака.
Неговиот соиграч Џејмс Нанали со 21 поен беше најефикасен на средбата, двоцифрени во тимот на Жељко Обрадовиќ беа уште Слукас со 13 коша и Удох со 10. Ник Калатес, пак, го предводеше ПАО со 16 поени, Николс даде 14, Фелдеин и Риверс забележаа по 10 во домашната екипа за која, речиси, сите играчи имаа реализаторски придонес во победата.
Домашните екипи ја искористија предноста на домашниот терен и во двата преостанати меча со кои се комплетира 12 рунда. Галатасарај, резултатски тесно, славеше над Армани Милано со 83:80, а ЦСКА Москва беше убедлива против Барселона со 92:76.