Енди Мареј по голема борба и со пресврт го совлада Кеи Нишикори во второто коло во групата А или „Џон Мекинро“ и се најде на чекор до полуфинале на завршниот АТП Мастерс во Лондон. Британецот на крајот славеше со 6:7, 6:4, 6:4 по три ипол часа минати на терен за нови 200 бода на неговото конто, но и рекорд во времетраење на меч во историјата на турнирот. Ова беше нивна 10 пресметка и осма победа на првиот светски рекет во моментот.
Јапонецот беше подобар во 88 минутниот прв сет. Го доби во тај-брејк со 11:9 на разочарување на присутните во „О2“ арена. Место за стравување кај нив, сепак, немаше. Мареј заигра како што очекуваа, како што посакуваа, дополнително го подигна ниво на игра и со еден брејк во конечните 6:4 израмни на 1:1. Отпорот на жилавиот Нишикори се кршеше на идентичен начин и во решавачкиот сет. Британецот успеа да поведе со 5:1 што не беше причина за предвремено предавање иако многумина на трибините помислија дека работата е завршена.
И кога сите веќе го „прежалија“ Нишикори, тој освои три гема во низа и даде до знаење дека сè уште е присутен, дека сè уште е во игра, дека и ментално е присутен на терен и дека не се предава до последното топче. Десеттиот гем, сепак, му припадна на Британецот на воодушевување на гледачите во арената во британската престолнина. Мареј одигра кога му беше најпотребно, спаси 11 брејк топки, а неговиот ривал избрзуваше во моментите во кои требаше да зададе решавачки удар. Мечот, според најголем дел од медиумите“ е прогласен за најдобар во досегашниот тек на турнирот оваа година.
Вечерва во 21 часот ќе играат Вавринка – Чилиќ за комлетирање на второто коло во групата А.