Претседателот на САД, Џо Бајден денеска се обрати до нацијата и одговараше на прашања околу новиот вид на ковид-19. Именуван како Омикрон, вирусот најпрвин беше откриен во Јужна Африка, за потоа да се прошири најмалку во 14 земји.

Претседателот рече дека Омикрон е причина за загриженост, но не и за паника и уште еднаш повика на масовна вакцинација во земјата, нагласувајќи дека е неопходно да се земе и третата, засилувачка доза. Тој истакна дека администрацијата активно работи со производителите на вакцини за вакцинација на сите Американци.

На брифингот на кој одговараше на прашања од новинари, учествуваше и Ентони Фаучи, главниот експерт за инфективни заболувања во Белата куќа.

Бајден денеска се среќава со раководителите на повеќе компании за да посочи на проблемите со снабдувањето и инфлацијата за време на празничната сезона на шопинг, а во сенка на новата варијанта на коронавирусот.

Инаку, американската администрација презеде низа мерки за намалување на инфлацијата која пред некое време достигна максимално ниво во изминатите 31 година. Мерки со кои се намалуваат пречките во снабдување, како растоварување на пристаништата и давање повеќе време за премин на камионите по автопатиштата на земјата.

Тој истакна и дека се води истрага за зголемените цени на транспортните услуги и за можните незаконски дејства со местење на цената на бензинот.

Шефот на Белата куќа денеска се среќава со првите луѓе на компаниите Best Buy, Food Lion, Samsung North America, Qurate Retail Group, Todos, Etsy, Mattel и Kroger. Виртуелно ќе се приклучат и генералниот директор на Walmart Даг Макмилон и генералниот директор на CVS Health Карен Линч.