Четири балкански држави се обединуваат во амбициозен проект. Србија, Грција, Бугарија и Романија започнаа разговори за заедничка кандидатура за Светското фудбалско првенство во 2030 година. Замислата ја потврди Красен Кралев, бугарски министер за спорт и млади, по состанокот со своите колеги од соседните земји.
Желбата беше првично иницирана од грчкиот премиер Алексис Ципрас на средбата на високо ниво кај нашиот источен сосед на која учествуваат премиерите на Бугарија и на Романија, Бојко Борисов, односно, Виорика Данчила и српскиот претседател, Александар Вучиќ.
Според Кралев, заедничката кандидатура би значела важен политички симбол и би претставувала доказ дека балканските земји се способни за сплотување во областа на спортот, но и подготвеност да застанат во одбрана на политичките и економски интереси.
Иницијативата, секако, побуди голем интерес во Србија, во Грција, во Бугарија и во Романија. Дел од авторитетите во нив изразија симпатии и одобрување, но дел сметаат дека е тешко изводлива поради лошата инфраструктура во регионот. Меѓу скептиците и легендарниот бугарски фудбалер, Христо Стоичков.
„Една работа е да се поднесе кандидатура. Тоа го може секој. Но, не може секој да победи во изборот“, истакна Стоичков за бугарската национална ТВ.
Наредното Светско првенство во 2022 година ќе се одржи во Катар, а мундијалот во 2026 година ќе го организираат САД, Канада и Мексико. Турнирот во 2030 година ќе прослави јубилеј – 100 години од премиерното издание во Уругвај. Заедничка кандидатура досега е потврдена од Јужна Америка (Аргентина, Уругвај и Парагвај) и од Африка (Мароко, Тунис и Алжир). Во најава се две европски – една од Англија, Шкотска, Велс, Република Ирска и Северна Ирска, а втората од Шпанија и Португалија како и една од Азија (Јужна Кореја, Јапонија, Кина и Северна Кореја).