Германија има најголеми шанси за освојување, односно, одбрана на шампионската титула на Светското фудбалско првенство во Русија. До ваков заклучок дојдоа аналитичарите на швајцарската банка „Ју-Би-Ес“ (УБС) врз основа на програма што ја користат при нивните предвидувања за движење на цените на светските економски пазари. Шансите за победа на турнирот што притоа ги добија „панцерите“ изнесуваат 24 отсто или за 4,2 отсто повеќе од Бразил на второто место и 7,9 отсто повеќе од Шпанија на третото место.
„Германија и Бразил ќе имаат лесни задачи во групите за разлика од Шпанија која уште во првото коло ќе игра со актуелниот европски првак, Португалија“, појаснува Мајкл Болингер, шеф на одделот за распоредување на имот на прогресивните пазари при УБС која го има едно од најголемите портфолија во светот.
Во вториот ешалон на фаворити, според банкарската анализа, се најдоа Аргентинна, Белгија, Франција и Англија. Програмата на УБС се темели на статистички модел што опфати резулати на репрезентациите на последните пет мундијали, проценка на силата на секој тим согласно фудбалерите кои се очекува да заиграат во Русија како и исходите во квалификацискиот циклус за завршниот турнир.
„Судбината на Аргентина во голема мера ќе зависи од формата на нејзините најголеми ѕвезди што по наше мислење е непредвидлив фактор и тешко се опфаќа со квантитативната метода што ја користиме“, додава Болингер.
Употребените параметри во анализата исфрлија пет селекции без никакви шанси за освојување на титулата. Тоа се Саудиска Арабија, Египет, Костарика, Панама и Тунис додека само Панамците, меѓу аутсајдерите, не се гледаат како финалисти на СП 2018.