Лионел Меси е еден од најдобрите фудбалери во историја, ако не и најдобар. Дека е така Аргентинецот покажа и вечерва на „Камп Ноу“ во убедливата победа на Барселона над Ливерпул со 3:0 во првиот дуел од шпанско-англиската полуфинална пресметка во Лигата на шампиони.
Голеадата ја започна Луис Суарез во 26 минута по асистенција на Жорди Алба по што на сцена стапи малиот волшебник од Росарио. „Десетката“ на Каталонците постигна два од трите гола за екипата на Ернесто Валверде, а особено импресивен беше вториот или последен за домашните во 82. минута со кој ги „запали“ социјалните мрежи.
Судијата Бјорн Куиперс досуди слободен удар за Барселона на околу 30 метри од голот на Алисон Бекер чија што мрежа само што се смири од реализацијата на аргентинскиот ас во 75. минута. Меси ја намести топката и со лева шутираше неодбранливо за бразилскиот голман на „црвените“ за, многу веројатно, запечатување на нивната судбина во годинашното издание на ЛШ.
Вечерашниот настап ќе остане долго во меморијата на Меси. На овој ист ден пред 14 години го постигна првиот гол за Барселона, денеска му пресуди на Ливерпул со два со кои стигна до бројката од јубилејни 600 во кариерата. Притоа по јубилеен 100 пат ја носеше капитенската лента.
https://www.youtube.com/watch?v=FbXNPzlXmdc
Ливерпул до крајот се обиде со сите сили да постигне барем почесен гол за „оживување“ на реваншот на „Енфилд“. „Црвените“ тргнаа во јуриш, имаа две големи прилики во 84. минута и во 86. минута, но, за жал, останаа покуси за прослава. Најпрво Ракитиќ ја исфрли топката од, речиси, гол линија по ударот на Фирмињо по што следуваше и статива од Мохамед Салах.
Но, тимот на Јирген Клоп, исто така, можеше да биде и, резултатски, посурово казнет. Барселона во судиското екстра време имаше уште три прилики од контри меѓутоа не успеа да реализира ниту една.