Високата претставничка на Обединетите Нации (ОН) за човекови права, Мишел Башеле денеска ги повика земјите да дејствуваат решително во решавање на проблемот со климатските промени, нагласувајќи дека тоа е „прашање за опстанокот“ на човештвото.

Во изјавата пред климатскиот Самит на ОН во наредната недела во Глазгов, високата претставничка рече дека „само итна, приоритетна акција може да ублажи или спречи катастрофи што ќе имаат огромни, а во некои случаи и смртоносни, последици што ќе влијаат на сите нас, особено на нашите деца и внуци“.

Башеле ги повика владите кои учествуваат на самитот од 31 октомври до 13 ноември да ги исполнат ветувањата за финансиска помош за да помогнат на најранливите сиромашни земји да ги намалат своите емисии на штетни гасови и да се справат со ефектите од глобалното затоплување. Како што истакна таа, станува збор за опстанок.

„Без здрава планета за живот, нема да има човекови права, а ако продолжиме по нашиот сегашен пат, можеби ќе нема луѓе, посочи Башеле.