Белата куќа денеска соопшти дека претседател Џо Бајден ќе биде подложен на рутински колоноскопски преглед и своите претседателски овластувања привремено ќе ѝ ги пренесе на потпретседателката, Камала Харис.
Деталите за здравствената состојба на претседателот, кој утре ќе наполни 79 години, ќе бидат објавени подоцна денеска, соопшти Белата куќа.
Претседателот ќе биде подложен на рутинска колоноскопија во Медицинскиот центар ’Волтер Рид’, во близина на Вашингтон. Како што тоа веќе беше случај со претседателот Џорџ Буш кој во два наврата, во 2002 година и во 2007 година, беше подложен на истата процедура, а во согласност со уставната процедура, претседателот Бајден ќе ги пренесе своите овластувања на потпретседателката во еден краток период, додека се наоѓа под анестезија, се додава во соопштението на Белата куќа.
Бајден како 78-годишник стана највозрасниот американски претседател во историјата.