Основачот на „Тесла“, Илон Маск, продаде акции во вредност над 1,1 милијарда долари, јави „Си-Ен-Би-Си“, повикувајќи се на финансиски документи. Тој продал повеќе од 930.000 акции, откако беше обвинет за затајување данок. Меѓутоа, бизнисменот, сè уште поседува повеќе од 170 милиони акции во компанијата.
Продажбата на акциите веќе е реалност, откако бизнисменот на Твитер најави дека ќе продаде 10 отсто од своите акции во „Тесла“.
Основачот на „Тесла“ во саботата твитна дека „во последно време многу се зборува за неостварената добивка како алатка за даночно затајување“, па тој понуди да продаде 10 отсто од своите акции во „Тесла“ и изрази подготвеност да донесе одлука врз основа на анкета меѓу интернет потрошувачите. Повеќе од пола од нив или 57,9 отсто се изјаснија за продажба на акциите.
Весникот „Волстрит журнал“ истакна дека Маск останува најголем акционер во „Тесла“ со сопственост врз околу 17 отсто од компанијата, чија вредност се проценува на околу 200 милијарди долари. Тој, пак, објасни дека ги продава акциите за да си ги плати даноците.
Претходно, бизнисменот го критикуваше „данокот за милијардерите“, што го предлагаат демократите во американскиот Конгрес. Веднаш по неговиот твит, вредноста на акциите на „Тесла“ опадна, а капитализацијата на компанијата падна под еден трилион долари.
Американската компанија „Тесла Моторс“ е основана во 2003 година како иноватор и производител на електрични возила и сродни технологии. Седиштето на компанијата е во Пало Алто, во Калифорнија. Покрај електричните возила, компанијата произведува батерии и електрични мотори користејќи сопствена технологија и ги продава на други автомобилски компании како „Тојота“ и „Дајмлер“.
Според рејтингот на милијардери на „Форбс“, на 1 ноември годинава, Маск стана првиот човек во историјата чие богатство надмина 300 милијарди долари.