Белгија и Франција ја формираа првата полуфинална двојка на 21. Светско фудбалско првенство во Русија. „Црвените ѓаволи“ се најавија на мегдан на „триколорите“ во вторник по триумфот над Бразил во четврт-финалето со 2:1.
https://www.youtube.com/watch?v=eNAmuQ4iDXY
Водство на европската селекција на „Казањ арена“ ` донесе Фернандињо со автогол во 13. минута. За Белгијците до паузата погоди и Кевин де Брујне во 31. минута. „Кариоките“ во продолжение на средбата се обидоа да дофатат реми за екстра фудбал, постигнаа гол во 76. минута (Ренато Аугусто) за намалување на 1:2, но не успеаја по вторпат да го матираат Тибо Куртоа.
Франција во попладневниот термин го совлада Уругвај со 2:0. Составот на Дидие Дешамп беше подобар ривал на стадионот во Нижни Новгород во тек на целиот натпревар и заслужено се најде во големата четворка на мундијалот. Рафаел Варане во 40. минута и Антоан Гризман во 61. минута ја расчистија четвртфиналната рута на „триколорите“.
За утре се закажани и преостанатите две четвртфинални пресметки на турнирот во Русија. Од 16 часот на „Космос арена“ во Самара ќе играат Шведска и Англија, четири часа подоцна на стадионот „Фишт“ во Сочи ќе се судрат Русија и Хрватска.
Бразил – Белгија 1:2 (0:2)
Стадион: „Казањ арена“ во Казањ. Гледачи: Гл. судија: Милорад Мажиќ. Асистенти: Милован Ристиќ и Далибор Ѓурѓевиќ (сиоте тројца од Србија). Ж. картони: Вагнер, Фернандињо (Бразил); Муние, Алдервирлд (Белгија). Стрелци: Аугусто 76’ за Бразил; Фернандињо 13’, Де Брујне 31’ за Белгија.
Бразил (формација 4-2-3-1): Алисон – Марсело, Миранда, Силва, Вагнер – Фернандињо, Паулињо (Аугусто 73’) – Вилијан (Фирмињо 46’), Кутињо, Нејмар – Габриел Жезус (Диего Коста 58’). Селектор: Тите.
Белгија (формација 3-4-3): Куртоа – Фертонген, Компани, Алдервирлд – Муние, Фелаини, Витсел, Чадли (Вермален 83’) – Де Брујне, Азар, Лукаку (Тилеманс 87’). Селектор: Роберто Мартинез.