Повеќе девојки се огласија преку социјалната мрежа Инстаграм во последните неколку денови за да обелоденат дека келнер вработен во едно од најпосетуваните студентски кафулиња во градот ги силувал, а газдата не го санкционирал.

Сведоштвата се множат секојдневно на социјалните мрежи, повеќе девојки пишуваат дека биле дрогирани и потоа брутално силувани од келнер во кафулето “Ле Ваф“ во студентскиот дел на градот. Девојки и анонимни вработени во кафулето предупредуваат дека газдата не само што не го санкционирал осомничениот силувач, туку го преместил да работи во друго кафуле.

Дури по бројните сведочења бриселската полиција отвори истрага, но повеќе жртви во меѓувреме се огласија дека претходно поднеле пријави кои биле отфрлени од страна на полицијата. Темата стигна и до медиумите во последните два дена.

Сите девојки кои сведочат раскажуваат сличен модус операнди од келнерот – „ме најдоа гола и несвесна, не можев да одам веќе, немав сила во телото, се сеќавам само на неколку моменти од вечерта“.

Станува јасно дека едно од најпосетуваните кафулиња, “Ле Ваф“, но и “Ел Кафе“, во студентскиот кварт во Брисел повеќепати биле места каде студентки се нашле во иста ситуација. Келнерот ставал дрога во пијалоците на своите жртви, по што им нудел да ги придружи до дома. Сите девојки велат дека изгубиле меморија или свест во даден момент откако ја испиле пијалокот. НаЈверојатно станува збор за ГХБ, позната како дрога на силувањето.

Се намножија и сведоштва за расизам во истите кафулиња, на повеќе клиенти со африканско потекло им бил забранет влез. На социјалните мрежи се повикува на масовен бојкот на овие популарни места за младите.

Газдата на кафулињата досега не се огласил, не одговара на повици од новинарите, но во објава на социјалните мрежи кафулето тврди дека „многу сериозно ги сфаќа обвинувањата“. Според последните информации, вработениот е суспендиран. Јавното обвинителство во Брисел вчера соопшти дека е отворена официјална истрага.

Градоначалникот на општината каде се наоѓаат кафулињата изјави дека ги повикал сопствениците и менаџерите на кафулињата за да ги слушне нивните објаснувања и ќе информира какви мерки ќе бидат преземени, откако ќе добие повеќе детали од полицијата.

Според него, време е за „структурна работа“ со целиот угостителски сектор во неговата општина, сопствениците на дискотеките и кафулињата ќе треба да поднесат планови како ќе ја засилат безбедноста на нивните клиенти, посебно жените.