Дваесет и шест пратеници од британскиот Парламент побараа значителна промена во пристапот на надворешната политика кон Србија по присуството на претседателот Александар Вучиќ на воената парада во Москва на 9 мај, јавија српски медиуми.
Му напишав писмо на министерот за надворешни работи, барајќи значителна промена во пристапот на нашата надворешна политика кон Србија, по присуството на претседателот Вучиќ на воената парада во Москва на 9 мај. Писмото го потпишаа уште 25 парламентарци, објави на Х пратеничката на британскиот парламент Ема Левел.
Во писмото, меѓу другото, се наведува дека Србија под водство на Александар Вучиќ ги зајакнала врските со рускиот претседател Владимир Путин, „особено како единствена земја-кандидат за ЕУ што не вовела никакви санкции кон Русија и покрај ужасните злосторства извршени против Украина од 2014 година“.
Претседателот Вучиќ се обидува да ги дестабилизира Косово, Босна и Херцеговина и поширокиот балкански регион, тесно соработувајќи со Русија на Путин“ се наведува во писмото на пратениците до британскиот министер за надворешни работи.
Се забележува дека за време на владеењето на Вучиќ, Србија има значителен демократски застој, со постојани напади врз медиумите, политичката опозиција и граѓанското општество, широко распространета корупција, што придонело за масовни протести против неговата влада во последните месеци.
Настаните од 9. мај покажуваат еднаш засекогаш дека владата на Вучиќ нема интерес да ги прекине врските со Русија, додека активно промовира ултранационалистички, експанзионистички идеи за „Голема Србија“, што ризикува повторно да го доведе Балканот во крвав конфликт, се вели во писмото.
Затоа, како што наведуваат, пратениците „бараат од владата да го промени курсот, почнувајќи со серија целни санкции против претседателот Вучиќ, неговата влада и соработниците, и употреба на сите потребни дипломатски средства за да ги охрабриме нашите сојузници да го следат нивниот пример“.
Доколку сега не испратиме силна порака до српската влада, ризикуваме да ја зајакнеме решителноста на режимот на Вучиќ и да не успееме да го спречиме колапсот на кревката безбедносна ситуација на Балканот, напишаа пратениците во своето барање до британскиот министер за надворешни работи.
Тие, исто така, ја истакнаа својата поддршка за „студентите кои протестираат во Србија и граѓаните кои бараат подобра иднина за својата земја, ослободена од авторитаризам и корупција“.