Шарената револуција е тука, будна и порача:
„Од нас зависи. Мора да продолжиме да вршиме притисок врз злосторничкото здружение, врз власта, врз институциите и врз домашната и меѓународната јавност “, ова е последната порака на “шарените“ кои порачаа дека ќе бидат на штрек, за денеска повторно по неколку месеци пауза, да се вратат на улиците.
Сега на социјалните мрежи објавија повик за собир пред Собранието за попладне во 17 часот, а во знак на поддршка за Специјалното обвинителство.
„СЈО е под канонада на режимските гласноговорници. Периодов во Собранието и по медиумите можеме да забележиме вистински линч и пропаганда против Катица Јанева и целото обвинителство“, се вели меѓу другото во повикот за протест.
Она што беше обележје на реката од граѓани кои протестираа низ улиците во Скопје а потоа и низ други градови во Македонија се боите, кои и по неколку месеци се уште се “дел“ од фасадите на Собранието, Порта Македонија, Министерството за правда и други институции.
За време на протестите како повик за освестување на власта, беа упатени неколку пораки до властите, за нејзината нетранспарентност, за ненаменското трошење на парите, за корупцијата, за сомнителната еврообврзница, за аболицијата од претседателот Ѓорѓе Иванов, за убиството на Мартин Нешковски и други позначителни настани кои го свртеа рефлекторот врз Македонија како во домашната така и во меѓународната јавност.
Деновиве на тапет пред пратениците е специјалната обвинителка Катица Јанева, која треба да ги истражи индициите за криминал кои произлегоа од “бомбите“ на лидерот на СДСМ, Зоран Заев.
Соочувајќи се со пратениците, Јанева, претежно од владејачкото мнозинство во Собранието е предмет на исвиркувања, а истите негодуваат на нејзините одговори, бранејќи се дека таа немала капацитет да ги заврши обврските кои произлегуваат од Законот за Специјалното обвинителство.
Освен тензичните расправи кои се водат во Комисијата за политички систем и однос меѓу заедниците, на тимот на Јанева се уште им претстои одлуката на Уставниот суд, кој треба да се произнесе за законитоста на СЈО, како што е договорено според целокупниот Пржински договор.
Оттаму и потребата на Шарената револуција да се стави во улога на заштитник на обвинителството, барајќи индициите за криминал да се најдат во судски процедури и да се реши дали власта на екс-премиерот Никола Груевски вршела криминал во изминатите 10 години на владеење.
Она што започна како идеја а се формираше во концепт, Шарената револуција, неформално започна по објавувањето на бомбата за убиството на Мартин Нешковски, а на 12-ти април по објавувањето на аболицијата на Иванов за функционерите против кои СЈО води постапка протестите стануваа се помасовни и помасовни.
Под иста идеја се обединија луѓе со различни политички убедувања, студенти, пензионери, анархисти било да се Македонци, Албанци, Хрвати, Срби или Турци во надпартиско етничко или било какво друго обележје.
Иако првиот протест помина мирно и со засилено полициско обезбедување следниот ден демонстрантите се судрија со полицијата, откако целосно ја демолираа Народната канцеларија на Иванов. Тогаш беа приведени 12 демонстранти а кривични пријави произлегоа и за членови на новата партија Левица, односно за Здравко Савески, Владимир Куновски и Мариглен 
Демири.
Савески, Куновски како и студентот Борјан Ефтимов одреден период поминаа и во домашен притвор.
По тензичните протести на 13.април, протестите продолжија секојдневно.
„Ова ЌЕ биде триумфална порта“, „Ова кошта 208 Тамари“, се дел од пораките запишани на Порта Македонија.
Иницијална каписла на таквиот начин на протестирање беше огромното полициско обезбедување на седиштето на партијата на власт ВМРО-ДПМНЕ, за кое демонстрантите од Шарената револуција коментираа дека подобро е обезбедена и од Собранието и од Владата на Македонија. Затоа спомениците од проектот „Скопје 2014“ беа главната мета.
Нивните неколкукратни обиди за боење на барокната зграда на оваа партија во неколку наврати беа неуспешни а завршуваа со тензии помеѓу полицијата и демонстрантите.
Демонстрациите беа прекинати во средината на јули оваа година по постигнувањето на Договорот од Пржино во кој најголем дел од ултиматумите на Шарената револуција беа исполнети.
Денес, по нападите врз Јанева, тие ќе продолжат во голем собир во знак на поддршка.