На денешната седница на Комисијата за европски прашања на Бундестагот оценето е дека ситуацијата во Македонија е тешка и дека е неопходно посредништво за излез од кризата, јави „Дојче Веле“.
Јосип Јуратовиќ (СПД), додавајќи дека ситуацијата е тешка во поглед на формирањето влада. Тој смета дека мора да се продолжи со посредништво за да се признае резултатот од изборите и мнозинствата за составување влада.
„Во една демократија е легитимно коалициите, односно мнозинствата да се составуваат слободно. Со оглед на тоа што постои предлог за коалиција, едноставно се очекува Претседателот да се согласи со изборот. Сега сме повикани, односно европските институции во земјата треба јасно да му стават до знаење дека од демократски аспект од него едноставно се очекува тој со тоа да се согласи, тоа да го легитимира“, вели Јуратовиќ.
Тој е убеден дека со политички одговорните во Македонија мора да се зборува јасно.
„Не може да се стремите кон ЕУ, нам постојано да ни се повторува дека единствен проблем е името, а истовремено некој бара амнестија за корупцијата. ЕУ мора да покаже цврстина“, вели Јуратовиќ во изјавата за ДВ.
Тој смета дека „оние кои се на власт со сета сила избегнуваат соочување со правдата“.
„Според мое мислење, таму се кристализираше клика, која ја злоупотребувала власта можеби за лично богатење. Дека овој сомнеж е оправдан покажуваат обидите да се спречи независно судство и обидите да се влијае врз сѐ. Имам впечаток дека сите се плашат од ‘синдромот Санадер’, но тоа е блага варијанта. ‘Синдромот Санадер’ во регионот значи дека кога Хрватска дојде до преговори за поглавјата 23 и 24 , премиерот заврши во затвор 6 години. Токму тоа се сака да се спречи, да се избегне. Оттука доаѓаат дискусиите за амнестија и други работи“, рече Јуратовиќ.
Тој препорачува досегашните европски посредници да продолжат со медијаторство, а сестринските конзервативни партии на ВМРО-ДПМНЕ да ѝ укажат на партијата дека демократизација е неопходна.
Слично мислење има и Торстен Фрај од ЦДУ. Тој вели дека е неопходна нова иницијатива за партиите да седнат на маса и да најдат решение.
„Излез може да бидат само разговори. Можеби има можност преку посредство и медијација однадвор вакви разговори да бидат поттикнати и да се отстранат пречките. Ќе бидам сосема отворен – не мислам дека нови избори се опција. Гласачите гласаа како што гласаа, многу тешко, многу компликувано кога станува збор за формирање мнозинство за влада. Но, така е како што е и решение мора да се најде врз оваа основа“, вели Фрај.
Фрај вели дека на денешната седница на Комисијата во Бундестагот јасно се покажало дека мора повторно интензивно да се позанимаваат со регионот.
Тој советува дека е „неопходно партиите во Македонија да сфатат дека од изборите мора да се извлечат вистински заклучоци, дека не може да се оди на избори сѐ додека резултатите бидат некому по волја“.
„Според мене, станува збор за две работи. Прво, треба да се почитуваат резултатите од изборите, тоа важи и за мнозинствата добиени по тие избори. Второ, сомнежите на ВМРО-ДПМНЕ, но и голем дел од населението, односно воздржаноста кон платформата на албанските партии и повторното ставање во центарот на суверенитетот и унитарноста на државата, треба да се почитуваат. Врз основа на овие две премиси, според мое мислење, треба да се направи обид за решение на конфликтот“, смета Фрај.