„Состојбата е под контрола“, ваква СМС порака добил поранешниот министер Агим Хухиу од директорот на Бирото за јавна безбедност, Митко Чавков, на 27. април во 17.59 минути. Министерот за внатрешни го предупредил Чавков, како раководител на Оперативниот штаб во МВР, дека состојбата во Собранието може да ескалира, но освен СМС пораката во текот на целата вечер со директорот на БЈБ повеќе не успеал да оствари телефонска комуникација.
Ова се детали од Извештајот на Работната група за расветлување на настаните од 27. април кој денеска е завршен и ќе биде доставен до Јавното обвинителство. Министерот за внатрешни работи, Оливер Спасовски, на прес конференција соопшти дека критичниот ден затаила хиреархиска структура во МВР, започнувајќи од собраниското обезбедување, па се до врвот во УБК и Оперативниот штаб под контрола на Митко Чавков.
Информацијата која Спасовски ја сподели со јавноста е класифицирана и тој директно со име и презиме не посочи ниту еден од лицата кои ја злоупотребиле функцијата, но рече дека до обвинителот Марко Зврлевски ќе биде доставен декласифициран материјал со сите детали до кои дошла Работната група при истрагата.
Извештајот е изготвен врз основа на извршени разговори со 35 припадници на МВР, анализа на настанот, преглед на видео материјал од телевизиите, службен видео материјал и аудио разговорите од Тетра системот на МВР.
„Овој извештај со филигранска прецизност потврдува дека заради партизираноста на одредени раководни структури во Министерството, овој државен орган падна на испитот на извршување на своите уставни и законски надлежности. Ова Министерство мора целосно да се департизира и декриминализира и да се ослободи од товорат за да може нормално да функционира. На вистинските професионалци во Македонија и на граѓаните им должиме Министерството да го исчистиме од срамот од 27 април и да ја вратиме честа угледот и довербата во институцијата“, рече Спасовски.
Хронолошки прва затаила Управата за безбедност и контраразузнавање. До Оперативниот штаб на МВР не доставила Проценка за безбедносната состојба во Р Македонија, обврска која произлегувала од одржаниот состанок со министерот за внатрешни работи. Недостатокот на оперативно разузнавачки информации и сознанија, влијаел на процесот на процената на безбеденоста проценка и донесувањето одлуки.
За 27.04.2017 година, Оперативниот штаб не направил соодветна проценка на состојбата и не бил активиран Планот за мерки и активности на Секторот за внатрешни работи Скопје во кој се предвидени можни сценарија и фази на постапување.
Критичниот ден од страна на Секторот за внатрешни работи Скопје не е користен видео надзорот на „Безбеден град“.
Идентификувани се пратениците кои се обиделе да го спречат полицаецот од внатрешното обезбедување кој се обидел да ги обезбеди вратите на Собранието. А, пак дел од полициските службеници од Одделот за заштита на определени личности и објекти кои биле присутни во Собранието при отварање на влезните врати, не презеле дејствија за да го заштита објектот.
Одговорните за внатрешното и надворешното обезбедување на Собранието побарале засилување, но од Оперативниот штаб и Помошниот штаб на Секторот за внатрешни работи Скопје, биле информирани дека нема дополнителни сили, бидејќи Бирото за јавна безбедност немало планирано полициски службеници во резерва (приправност).
Министерот Нухиу неможел да воспостави никаква комуникација со Оперативниот Штаб. Тој дури и лично издал команда да се евакуираат пратениците, но останатите членови на Штабот одбиле да го послушаат. Се до доаѓањето на Чавков во 20.07 минути, кога конечно издал наредба за спасување на претепаните пратеници.
Досега суспендирани се над 23 лица, а сослушани биле околу 180 лица во МВР кои учествувале во настаните. Покренати биле и преку 45 дисциплински постапки до моментов, соопшти Спасовски.
Тој додаде и дека еден дел од структурите во МВР, веднаш по настаните на 27 април, добиле задача да направат посебен извештај, кој требало да го подготват за еден ден и требало да даде такви резултати кои ќе им одговараат на поединци во МВР.
Поведени се дисциплински постапки за 45 лица, а во тек е целокупна истрага за тој инцидент. До овој момент, немаме разрешување за било која од тие позиции, изјави Спасовски.