Машката ракометна репрезентација на Македонија ја совлада БиХ со 28:24 во првиот од трите контролни средби во Скопје во рамки на подготовките за Светското првенство во Франција. Манасков беше прв стрелец со осум гола, по пет постигнаа капитенот Кире Лазаров и Стојанче Стоилов колку и Вегар и Овчина во гостинскиот состав. За утре и задутре се договорени уште два теста што ќе бидат затворени за јавност за разлика од вечерашниот во СРЦ „Кале“ што привлече околу 1.500 гледачи.

„Почнавме добро. Одигравме цврсто во одбрана што помогна да направиме разлика. Не реализиравме и неколку зицери и пенали. Да не заборавиме дека настапивме со 21 ракометар. Сите што беа во записникот, добија минутажа. Победа си е победа и секоја е добредојдена, но покрај добрите моменти имаше и лоши што треба да се анализираат и да се корегираат“, истакна Червар по средбата.

Иако селекторот Лино Червар најави дека резултатите ќе бидат во втор план, сепак, задоволство е присутно со оглед дека е прв меч по десетдневните тренинзи во Маврово. Шанса за настап добија сите играчи што ги повика Хрватот за оваа кампања. Македонија диктираше темпо, постојано беше во предност што не беше загрозена во ниту еден момент. На трипати во второто полувреме имаше и плус осум залиха што на крај беше преполовена како последица на пад на концентрација и честите замени на теренот, но и 19 интервенции на противничкиот голман, Буриќ.

Генералниот впечаток е солиден. Червар истакна задоволство од голманите, но покрај добрите страни истакна и лоши што тестот ги исфрли на површина. Ниту е строг во оценката бидејќи е само прв натпревар ниту пак е презадоволен да не дојде до опуштање.