Џанлуиџи Буфон ќе биде во фокусот на вниманието утревечер на „Ренцо Барбера“ на Сицилија во мечот на Италија против Албанија во квалификациите за СП 2018. Легендарниот голман на „азурите“ ќе забележи 1.000 настапи во кариерата.
Меѓу стативите на Парма беше во 220 меча, за Јувентус има 612, а против Албанците ќе го впише 168 настап во националниот тим и ќе стане само 18 фудбалер со 1.000 и повеќе одиграни натпревари.
Врвот на листата ја предводат тројца голмани. Двајца од нив се Англичани – Питер Шилтон со 1.390 средби и Реј Клеменс со 1.118, меѓу нив е Бразилецот Рожерио Сени со 1.234.
„Кога Буфон се приклучи на тренинзите со првата екипа не верував што гледам. Беше извонреден иако имаше само 17 години. Постојано ги прашував соработниците дали глдаме исто, дали го гледаат тоа што јас гледам“, се присетува Невио Скала, тренер на Парма во минатото.
Буфон го одигра првиот меч во кариерата на 19 ноември во 1995 година за Парма против Милан. Две години подоцна имаше премиерата и за Италија во квалификациите за СП 1998 против Русија. Мечот го почна на клупата и во игра влезе во 31 минута наместо повредениот Џанлука Паљука. Со своите 19 години тогаш стана најмлад голман во репрезентацијата од Втората светска војна, примат што од 2006 година година го презеде Џанлуиџи Донарума кој дебитира за „азурите“ на возраст од 17 години и шест месеци.
Во летото во 2001 година потпиша за Јувентус, чиј член и денеска е, за сума од 53 милиони евра. На позицијата „еден“ во Торино го наследи Холанѓанецот Едвин ван дер Сар.