Талибанците денеска најавија дека целосно ќе забранат употреба на девизи во Авганистан.
Економската ситуација и националните интереси на земјата ја наложуваат потребата од користење на домашната валута од сите Авганистанци при секое тргување, соопшти еден од портпаролите на талибанците, пренесува „Ројтерс“.
Употребата на американски долари е широко распространета на авганистанскиот пазар, додека при тргување во граничните подрачја се користат валути на соседните земји како што е Пакистан.
Портпаролот на талибанците, Мухамед Сухаил Шахин на 29 октомври ја повика меѓународната заедница да обезбеди 1,2 милијарди долари за материјална помош, сума што беше ветена за земјата на Самитот на Г20.
Шахин, кој е именуван и за амбасадор на Авганистан во Обединетите Нации (ОН), рече дека талибанската Влада во целост е подготвена да соработува преку одредени агенции и други невладини организации на терен и порача дека меѓународната заедница треба да го поддржи Кабул на тој начин што ќе „одмрзне“ 10 милијарди долари авганистански средства во странство и ќе продолжи да го финансира развојот и проектите што беа ветени на конференцијата во Женева.