Ракометарките на Вардар почнаа спротивно одошто помислуваа и имаа завршница каква што воопшто не посакуваа во мечот со Мец. Во меѓувреме, во неколку наврати од вториот водеа со пет гола разлика, еднаш и со шест, но драма на крајот не избегнаа. Наместо рутинско приведување на мечот кон крај, се доведоа во ситуација да потпишат пакт со стативата во нападот за реми на Французинките и Радичевиќ да стави печат на двата бода.

„Не одигравме добро. Натпреварот беше тежок. Нè изненадија со нивната одбрана 3-2-1 на што не бевме подготвени. Нѝ зададе доста проблеми. Најважно, сепак, е дека победивме“, истакна Давид Дејвис на прес-конференцијата по седмата победа на вардарки во ракометната Лига на шампиони.

Мец се прикажа во добро издание во Скопје, констатација што ја сподели и Сања Дамњановиќ, најефикасната „црвено-црна“ девојка со пет погодоци во рекордната седма клупска победа во серија во натпреварувањето.

„Доста се истрошивме во Подгорица. По мечот со Будуќност бевме свесни дека ќе биде тешко со Мец. Се случи и пад во играта, а противникот нè изненади. Прво со агресивната игра, потоа со поставеноста 3-2-1 во одбрана, со трчањето во текот на сите 60 минути. Ретко која екипа може да одигра како француската. Сепак сум пресреќна со двата освоени бода и се надевам дека ќе донесеме два и од Германија“, рече Дамњановиќ.