Шкендија го одби нападот на Вардар за бодовно приближување и загризување на нејзината лидерска позиција на табелата во домашното фудбалско првенство. „Црвено-црното“ дерби на „Еколог арена“ заврши без победник (1:1) што значи останување и на осумте бода предност на тетовци во однос на бранителот на титулата. Вардарци поведоа преку Бобан Грнчаров во 79 минута, израмни Бесарт Ибраими во 86.
Победник немаше и на два од преостанатите три меча што се играа попладнево. Со идентичен резултат како во Тетово заврши и дуелот меѓу Победа и Пелистер. Борче Маневски реализира за битолчани во деветтата минута, Даноски возврати две минути подоцна за прилепчани за 1:1, резултат што остана непроменет до крајот.
Најсиромашно со голови беше на натпреварот Работнички – Ренова (0:0), но затоа на Чаир беа постигнати седум пришто Шкупи ја совлада Академија Пандев со 5:2. Баже Илијоски беше централна фигура и со хет-трик го прослави дебито за чаирчани во официјален меч. Искусниот напаѓач погоди во седмата минута, во 17. и во 23., во второто полувреме се надоврзаа Ален Јашароски во 59 минута и Кристијан Стојкоски во 79. Двата за „академците“ беа дело на Стоилов во 31 минута и Италијанецот Џулио Грифони во 71.
Прволигашки фудбал денеска, и покрај најавите, сепак, немаше во Кратово каде Силекс треба да игра со Скопје. Мечот беше одложен поради отсуство на услови за игра.
Прва лига, 19 коло
Шкендија – Вардар 1:1
Победа – Пелистер 1:1
Работнички – Ренова 0:0
Шкупи – Академија Пандев 5:2
Силекс – Скопје (одложено)
Табела: Шкендија 47, Вардар 39, Силекс 31 (-1), Шкупи 26, Академија Пандев 25, Работнички 24, Победа 20, Ренова 19, Пелистер 17, Скопје 10 (-1).
Идно коло (18.02.2018 год.): Шкупи – Шкендија, Вардар – Победа, Ренова – Силекс, Академија Пандев – Скопје, Пелистер – Работнички