Европската комисија (ЕК) денеска го презентира извештајот за заштита на безбедноста на потрошувачите и производите на внатрешниот европски пазар додека земјите на Европската Унија (ЕУ) генерално бележат напредок во надзорот и реактивноста. Според податоци од земјите членки на ЕУ, националните власти од година во година преземаат сè повеќе и поефикасни мерки за справување со лажни и небезбедни производи кои влегле на пазарот, изјави еврокомесарот за правда, Дидие Рејндерс на претпладневната прес-конференција.
Европската комисија воспостави служба за брза реакција која работи 24/7 и прима пријави за производи кои не се во согласност со пазарните стандарди на Европската унија. Лани биле пријавени 4.477 производи, а претходната година – 4.050. Освен земјите членки на ЕУ, во овој систем учествуваат уште Обединетото Кралство, Норвешка, Исланд и Лихтенштајн.
Во споредба со 2015 година, стапката на пријавени опасни производи е зголемена за 63 отсто. Играчките за деца се најчесто пријавувани како опасни предмети, потоа моторните возила и електричните направи и опреми на трето место. Козметичките производи и модните парчиња се, исто така, високо на списокот, предупредува Комисијата.
Производите најчесто се пријавени затоа што предизвикале физичка повреда како скршеница, но пријавувани се и предмети поради нивните хемиски состојки, како и ризикот од гушење кај деца. Властите најчесто реагирале со отстранување или уништување на производите.
Извештајот се однесува на 2019 година, но Европската Комисија информира дека од почетокот на оваа година пријавени се веќе бројни предмети поврзани за Ковид-19 како маски, дезинфекциски производи и слично, а властите веќе реагирале и за овие случаи кои ќе бидат дел од извештајот идната година.
„Како што видовме од извештајот за 2019 година, рекордно ниво на работа се врши за да се заштитат потрошувачите од опасни производи“, изјави еврокомесарот за правда, Дидие Рејндерс.