Денеска во 11 часот треба да продолжи седницата на која се расправа за предлог законот за Јавното обвинителство. Таа синоќа беше прекината претседателот на Собранието поради немање услови да продолжи, бидејќи за збор во расправата се јавиле 38 пратеници. Но, она што го привлече вниманието беше повикот на Џафери, партиските лидери да се изјаснат дали имаат желба изборите да се одржат на 12 април.
„Се додека примам пораки дека има можност да се создаде друго мнозинство, дека ќе биде поуспешно, јавно ги повикувам партиските лидери доколку сериозно мислат дека имаат потреба да создадат друго мнозинство, јавно ќе организирам да има лидерска средба согласно Пржинскиот договор, согласно договорот за предвремени избори за 12 април, да потврдиме дека има желба да се одржат“, рече Џафери.
Ваквиот негов повик дојде, откако Генералниот секретар на СДСМ, Љупчо Николовски, во гостување на ТВ „21“ изјави дека ако опозицијата го оневозможува гласањето на важните закони, тогаш се отвора опцијата за формирање ново парламентарно мнозинство и избори во редовен термин.
Не сме венчани
Претседателот на Собранието вели дека направил се што е во негова надлежност.
„Јас ли сум виновен што оставија важни закони да се усвојуваат во последните два дена пред распуштање на парламентот? – Сите закони кои ги сметаат за приритетни се ставени на дневен ред. Оној за ЈО го доставија на 10-ти февруари, а знаеја дека на 11-ти имаме ратификација на Северноатлантскиот договор. Од септември преговараат за Јавното обвинителство и јас ли сум виновен што сè се собра во два дена? – Јас не продавам време и не располагам со екстра време. Не знам кој со кого се расправа и за што се убедува, но ако сакаат ново парламентарно мнозинство, ред е да дојдат и да кажат, а не да се расправаат преку мене. Нека објаснат зошто пред шест месеци се договорија да има избори на 12 април. Ако не сакаат избори, ако сакаат ново мнозинство, нека кажат. Не сме венчани. Но, ако со тоа се вратиме во периодот на политичката криза каква што беше во 2015 година, тоа ќе биде нивен проблем“, вели Џафери во разговор за „Дојче Веле“.
Вели дека секој на негово место би се запрашал „каква е намерата“, ако изјавата за ново мнозинство не доаѓа од кого било, туку од Генералниот секретар на СДСМ.
„Јас седницата за распуштање на парламентот веќе ја закажав за недела на 16 февруари. Ако некој не сака да се распушти парламентот, нека гласа против. Јас како претседател на парламентот имам обврска да ги обезбедам роковите за изборните дејства. Тоа е индивидуален акт и моја индивидуална одговрност, односно сносам поединечна кривична одговрност доколку не го обезбедам тоа“, вели Џафери.
Услови за демократска процедура
Што изјави синоќа Генералниот секретар на СДСМ, Љупчо Николовски?
„Доколку во Собранието се продолжи со тактизирање и ако на било кој начин се оневозможи гласање на важните законите, а особено Законот за јавно обвинителство, изборниот законик, Законот за одбрана разрешувањето на Мизрахи, во тој случај постои реална можност ние да направиме ново парламентарно мнозинство, а потоа и нова стабилна влада која ќе организира редовни парламентарни избори“, изјави Николовски.
Тој потенцира дека најважно е да се обезбеди демократска процедура за гласање на Законот за јавно обвинителство.
„Никој не смее да се дрзне одново да блокира и опструира. Без разлика дали има или нема мнозинство за законот, мора да се обезбедат услови за гласање. Овој Закон за јавно обвинителство има поддршка од Европската Унија, од САД и претставува основа за правна држава и за владеење на правото“, рече Генералниот секретар на СДСМ.
Притоа ги повика сите политички партии да овозможат гласање на законите.
„Ние не би сакале да дојде до редовни избори затоа што веќе имаме закажано термин за предвремени, но се наоѓаме во ситуација во која структури нè опструираат, односно прават се да не дојде до гласање. Со ова се опструира правдата и се враќа државата назад. Тие структури ги знаете, се плашат од иднината соочени со криминал и пресуди“, изјави Николовски.
Лидерот на ВМРО-ДПМНЕ, Христијан Мицкоски, смета дека тоа е знак на нервоза.
„Не би го коментирал овој господин. Мислам дека текстот е напишан од неговиот претседател. Срамот е огромен и се бара начин луѓето да се скријат од одговорност. Јасна е намерата на Заев по било која цена да ги одложи изборите или на насилен начин со пазар. Ова е знак на нервоза. Да видиме како ќе се одвиваат работите и ќе имаме соодветен одговор“, изјави тој.
Веќе извесен период пратеници тврдат дека се под силен притисок и разни заплашувања да не гласаат за законот за ЈО. Синоќа на пратеничката Емилија Александрова од Независната пратеничка група на ВМРО-ДПМНЕ, која го поддржува законот за ЈО, и бил оштетен автомобилот на паркингот пред Собранието.
Засега нема информации дали пратениците ќе се охрабрат и ќе ги пријават заплашувањата.
Денеска, покрај 135-тата седница на која од 11 часот ќе се расправа за предлог законот за ЈО, во 15 часот е закажана и 136-тата седница, на чиј дневен ред е Предлог за разрешување на министерката Рашела Мизрахи.
