Наполи ја совлада Бенфика со 2:1 во меч што се најавиваше како директна пресметка за нокаут фазата во Лигата на шампиони, но наместо, на крајот, се радуваа двете екипи. За општата славеничка атмосфера на стадионот „Луж“ во Лисабон се погрижи Динамо Киев кој како домаќин го декласира Бешикташ со 6:0. Трите бода, освен за сопствено реноме и дополнителна сума на евра во клупската каса, не значеа ништо за Украинците кои претходно останаа без шанси и за Лига Европа. Турскиот клуб, пак, со триумф ќе се надеваше на прогрес меѓутоа доживеа тежок пораз, а мечот го заврши и со двајца фудбалери помалку на теренот (црвени картони добија Бек во првото полувреме и Абубакар во второто).
Лудогорец беше на прагот на сензација во Париз против ПСЖ во натпревар што на крајот заврши без победник. Изненадување спречи Анхел ди Марија во судиското продолжение за конечни 2:2 на „Паркот на принцевите“. Тимот од Разград, сепак, задоволен се враќа дома бидејќи со освоениот бод и поразот на Базел од Арсенал, за Бугарите значи преселба во нокаут фазата во Лига Европа.
Ситуацијата беше кристално чиста во групата Ц пред ова коло. Непознати немаше никакви. Барселона продолжува како лидер, Манчестер сити како втор, Борусија Менхенгладбах како трета во утешната Лига Европа, европските настапи завршуваат за Селтик. Каталонците на „Камп Ноу“ го совладаа бундеслигашот со 4:о, премиерлигашот и шкотскиот ривал одиграа 1:1 на „Етихад“.
Атлетико Мадрид, сепак, не успеа да заврши со максимален ефект или непоразен во групната фаза. Баерн во Минхен го победи составот на Диего Симеоне со 1:0. Холандски ПСВ ремизира со Ростов (0:0) во Ајндховен и на тој начин се збогува со фудбалска Европа за оваа сезона.
Лига на шампиони
Резултати, 6. коло
Група А: Базел – Арсенал 1:4, ПСЖ – Лудогорец 2:2. Табела: Арсенал 14, ПСЖ 12, Лудогорец 3, Базел 2.
Група Б: Бенфика – Наполи 1:2, Динамо Киев – Бешикташ 6:0. Табела: Наполи 11, Бенфика 8, Бешикташ 7, Динамо Киев 5.
Група Ц: Барселона – Борусија Менхенгладбах 4:0, Манчестер сити – Селтик 1:1. Табела: Барселона 15, Манчестер сити 9, Борусија Менхенгладбах 5, Селтик 3.
Група Д: Баерн Минхен – Атлетико Мадрид 1:0, ПСВ Ајндховен – Ростов 0:0. Табела: Атлетико Мадрид 15, Баерн Минхен 12, Ростов 5, ПСВ Ајндховен 2.