Претседателот на Светската фудбалска асоцијација (ФИФА), Џани Инфантино е реизбран на функцијата што ќе остане да ја извршува до 2023 година. Швајцарецот со италијански корени беше единствен кандидат на изборите на 69. Конгрес на организацијата што денеска се одржува во Париз.
„Оваа организација премина од, речиси, криминална токсичност на она што треба да биде, организација што го развива фудбалот и која се грижи за фудбалот. Ја трансформиравме во нова ФИФА, организација чии синоними се кредибилитет, доверба, интегритет, еднаквост, човекови права. Последните три години и четири месеци сигурно не беа совршени. Грешев, се обидував да направам некои работи да бидат подобри, но денеска на денот на избор никој не зборува за криза, никој не говори за обнова на ФИФА од почеток, никој не говори за скандали. никој не говори за корупција“, изјави Инфантино по реизборот.
Инфантино е на чело на ФИФА од 2016 година. Должноста ја презеде во ек на најголемиот скандал во историјата на организацијата и на позицијата го наследи Сеп Блатер.