Американскиот претседател Џо Бајден и шпанскиот премиер Педро Санчез се договорија две воени бази во јужна Шпанија да се користат за прием на Авганистанци кои работеле за американската Влада, јави денеска шпанската Влада.
Во синоќешниот телефонски разговор, Бајден и Санчез се согласиле дека базите во близина на Севилја и Кадиз ќе се користат за бегалци од Авганистан, додека не се договори нивното заминување во други земји, пренесуваат британските медиуми.
Санчез синоќа на Твитер напиша дека имал конструктивен разговор со претседателот Бајден за прашања од заеднички интерес, а особено за ситуацијата во Авганистан и соработката во евакуацијата на граѓаните од таа земја.
Авион со 110 авганистански бегалци и нивните семејства, вчера пристигна во Шпанија, во воена база во близина на Мадрид, вклучувајќи и 36 лица кои работеле за американската администрација во Авганистан.