Договорот за спорот за името ќе се потпише во преспанското село Нивици или Псарадес на грчки. Потпис на договорот за решавање на 27 годишниот спор за името, ќе стават македонскиот и грчкиот министер за надворешни работи Никола Димитров и Никос Коѕијас како и специјалниот посредник Метју Нимиц. Освен премиерите Заев и Ципрас, на потпишувањето на Договорот ќе присуствуваат и еврокомесарите Могерини и Хан и заменичката на генералниот секретар на ОН.
По потпишување на билатералниот договор , протоколот предвидува заеднички ручек на делегациите но во македонскиот дел на Преспа. Ова ќе биде и прва посета на грчки премиер на Македонија, по повеќе од една деценија.
Потпишувањето на договорот ќе го следат и протести. Населението од Северна Грција се мобилизира за утрешните протести во Преспа. Демонстрациите ги организира „Комитетот за одбрана на грчкиот карактер на Македонија“ кои организираат и автобуски превоз за оние кои ќе сакаат да учествуваат на протестот.
Во Битола, протестен марш ќе одржи опозициската ВМРО ДПМНЕ, која смета дека „договорот е штетен и е во спротивност на националните интереси“.
Пред потпишувањето на Договорот, министерот за надворешни работи Никола Димитров кажа дека „утре е историски ден“.
„Имаме сили што се борат за напред, за иднината, имаме сили што се борат за назад, за минатото. Минатото не можеме да го смениме, иднината можеме. Мислам дека тоа е многу голем чин, на некој начин бевме охрабрени од Договорот за пријателство со Бугарија. Ова е нашето последно отворено прашање и на некој начин завршува една фаза на прашалници, на предизвици. Многу ќе биде важно овој чин да ги отвори вратите и на ЕУ и на НАТО бидејќи меѓудругото, покрај пријателството со Грција, македонските основни мотиви се да се отворат вратите и конечно да излеземе од таа чекална, каде што сме заклучени премногу години, рече Димитров.
Шефицата на бугарската дипломатија Екатерина Захариева изрази увереност дека по потпишувањето на договорот за името меѓу Македонија и Грција, Македонија конечно ќе може да отпочне преговори за членство во ЕУ, а потоа ќе добие и покана за влез во НАТО.
Основата на договорот што го постигнаа Македонија и Грција е земјава да се преименува во „Република Северна Македонија“ за севкупна употреба, признавање на македонскиот јазик и македонскиот идентитет.