Кардиологот Омер Џемаили кој работи во Швајцарија, бара да биде тргнат од листата на национални советници на Министерот за здравство, каде бил именуван на крајот од минатиот месец. За оваа функција вели тој, случајно дознал од медиумите. Тој преку писмено соопштение се дистанцира од советничкото место, со образложение дека поради професионалниот и приватниот живот, немал доволно време да ја врши оваа дополнителна работа.
„Јас, му се заблагодарувам на Министерството за здравство за почитта што ја имале кон мене за да ме именуваат на оваа позиција, и за досегашната поддршка, но, моето ангажирање во професијата и во академскиот живот, но и приватниот, не ми овозможува уште едно дополнително ангажирање. Затоа, сакам јавно да се дистанцирам од оваа одлука од страна на Министерството за здравство, и со почит кон нив, барам моето име да се тргне од оваа листа на национални советници во Министерството за здравство“, пишува Џемаили во соопштението.
НОВА ТВ минатата недела објави дека како национални советници на министерот за здравство, се најдоа и самиот министер Таравари, неврологот Мерита Исмаили Марку и државниот секретар на министерот за здравство Владимир Милошев.
По написот на НОВА ТВ сите тројца си поднесоа оставки.