Првиот директор на ФБИ, Едгар Хувер на 24.ноември 1963 година, кога е елиминиран убиецот на Џон Ф. Кенеди, Ли Харви Освалд, во записникот запишал „Нема ништо ново во случајот Освалд, освен што тој е мртов“.
Аналитичарите се согласуваат дека објавувањето на класифицираниот материјал од 2.800 страни, кој го достави администрацијата на Доналд Трамп, не носи ништо ново за атентатот на американскиот претседател Кенеди во 1963 година.
Но како што поминува времето, а американските новинари ја прегледуваат дата базата објавена од Трамп, излегуваат и по неколку трошки на виделина, токму од записот на Хувер од 24.ноември.
Хувер стравувал дека јавноста нема да се задоволи со информацијата дека Ли Харви Освалд не бил дел од ниту еден заговор за елиминирање на Кенеди, туку дека дејствувал сам.
Тој во 1964 година тврдел дека нема ниту еден доказ за теорија на заговор во која учествувал и Освалд, и потенцирал дека и јавниот обвинител во тоа време, Никлас Каценбах, стравувал од истото.
Како што пишува Ен-Би-Си, и покрај анализата на записот на Хувер, сепак не може да се забележи во што точно првиот директор на ФБИ верувал, но сигурно не сакал да се знаат неговите мислења во јавноста како влијателен човек.
Каценбах во минатото има објавено записник за тоа дека Хувер бил загрижен. Во портфолио кое датира од 25.ноември 1963 година, јавниот обвинител запишал „јавноста мора да се задоволи со тоа дека Освлад е убиецот, дека немал соучесници и дека доказите се доволни за тој да биде осуден пред суд“.
Во еден од документите објавени денес, стои дека ФБИ ја предупредил полицијата на Далас, дека Ли Харви Освалд е во опасност и дека може да биде убиен, но полицијата не реагирала, што го загрижувало директорот на ФБИ.
„Неопростливо е што и покрај нашите предупредувања, Освалд е убиен“, пишува во документот на Хувер од 24.ноември 1963. „Ова ќе покрене метеж кај граѓанските организации за човекови права бидејќи Освалд носеше лисици на рацете а немаше оружје. Во нашето општество има некакви права, кои несомнено беа прекршени“, пишува Хувер.
Поранешниот прв човек на ФБИ бил противник на идејата случајот да го работи независна комисија, и барал надлежно да биде Бирото за правда.
Но по доаѓањето на власт на 36.претседател на Америка, Линдон Џонсон, тој ја формира Ворен комисијата која го презема случајот со убиството на Џон Ф. Кенеди.
Претседателот беше убиен на 22.номеври 1963 година додека парадираше со кабриолет лимузина низ Далас.
За убиството е обвинет поранешниот маринец Ли Харви Освалд, кој според судот, пукал во Кенеди од библиотека близу местото на убиството.
Во 1992 година, Конгресот донесе закон во кој сите записници поврзани со убиството, околу 5 милиони страни, да бидат затворени за јавноста во наредните 25 години.
