Од Демократската партија на Албанците (ДПА) на денешната прес-конференција истакнаа дека се против минимална плата за вработените во јавната администрација.
„Кратењето на платите на административците на минимално ниво е неприфатливо, бидејќи тоа не е решение за проблемот, туку само продлабочување на истиот“, истакна Бардил Даути, од Комисијата за економија при ДПА.
Наместо тоа, ДПА предлага да се раскинат сите неколку месечни договори со партиски членови што биле направени на неколку дена пред распишување на изборите и отпис на долгови на граѓаните.
„Оваа состојба ја влоши економската позиција на нашите семејства. Затоа бараме да се отпишат долгови како што се сметки за струја, вода, комунални такси, парични казни, комунални даноци и други даноци за сите граѓани, особено оние кои немаат сигурен приход или социјална помош. Покрај тоа, ние бараме, покрај тримесечното одложување на данокот, сегашните даночни стапки да се преполоват една година или додека не продолжи кризата“, рече Даути.