Демократскиот сојуз упатува честитки до студентите за кои вели покажале храброст во текот на вчерашниот ден и ноќта, при обидот да спречат одржување на криминални и нелегитимни избори за лидер на студентите.
– Студенти од Студентскиот пленум беа тепани од полицијата и насилно влечени, за да се овозможи да се прогласи лидер на студентите во организација на власта. Демократскиот сојуз најостро го осудува вклучувањето во кршењето на изборниот процес на активисти на ВМРО-ДПМНЕ и бара одговорност за сите што придонесоа за хаосот и грдите пораки кои се испратија до светот, се вели во соопштението на ДС.
ДС бара целосно расчистување на улогата и одговорноста на Министерот за внатрешни работи и Министерот за образование, како најдиректно вклучени во тоа што се случуваше во текот на ноќта.
Партијата смета дека наместо студентите да бидат единствени и заедно во борбата за владеење на правото, демократија, подобрување на квалитетот на образование и студентскиот стандард, македонскиот народ е сведок на поделби и “војна” за интересите на владејачкиот естаблишмент.
– Ако на овие избори пред очите на јавноста се случуваше хаос, полициска бруталност и фалсификат, што ли се ќе се случува на парламентарните избори. Во право се граѓаните кои се погласно коментираат “Од државата ништо не остана”, се вели понатаму во соопштението.
Демократскиот сојуз инсистира да се одржат парламентарни избори во Октомври за да се врати мирот и стабилноста.