Економска анализа на земјите што станаа членки на НАТО при последното големо проширување во 2004-та година кога на Алијансата и се придружија Бугарија, Естонија, Летонија, Литванија, Романија, Словачка и Словенија покажува забрзување на економскиот раст, зголемување на странските инвестици, зголемување на вкупните инвестици и зголемување на кредитната активност.
Според податоците на Светската Банка, кај сите овие земји било регистрирано и намалување на невработеноста, но интересно и зголемување на животниот век. Дел од овие земји, станаа членки на Европската унија истата година, освен Романија и Бугарија кои три години по приемот во НАТО, се придружија и на Европската унија. Кај сите земји по првичниот залет и раст на економијата, има застој во 2009 та поради економската криза, по што продолжува постепена сатабилизација на економијата.
Експертите се согласни дека подобрувањето на економските перформанси е поради фактот дека „економскиот раст зависи во голема мера од способноста на земјата да обезбеди одржлив мир и стабилност, односно долгорочна безбедност и политичка стабилност“, што го гарантира членството во НАТО.
Бенефит од зачленувањето во НАТО почувствува и Албанија која се придружи на Алијансата во 2009 та, кога на Македонија поради спорот со Грција и беше блокиран приемот во Алијансата и условен со рашавање на спорот за името.
Малите земји тешко можат да влијаат врз политиките и одлучувањето на глобално ниво. Единствениот начин да се зголеми влијанието е преку интеграции во наднационални организации. Со зачленување во НАТО и ЕУ, по принципот на “еднаков меѓу еднаквите” и принципот на солидарност и Македонија ќе има можност за влијание и еднакво право во носење на одлуките во овие организации.
Членството во НАТО обезбедува поголема безбедност што дава можност за политичка и економската стабилност. Членството во ЕУ значи влегување во голем и развиен пазар од 500 милиони потрошувачи, односно во најголемата светска економија со учество од 23,8% од светскиот БДП, по која следуваат САД со 22,2% и Кина со 13,4% во 2014 година (Eurostat).
БДП по жител во ЕУ изнесува околу 25,000 евра и просечна стапка на невработеност е 9-10%.
Македонија доби покана за членство во НАТО и Протоколот за пристапување треба да се потпише на почетокот на наредната година и да биде ратификуван во парламентите на сите земји членки на Алијансата. Во однос на Европската унија, комесарот за европска соседска политика и преговори за проширување на Европската унија Јоханес Хан на вториот ден од подготвителниот скрининг со Македонија рече дека почетокот на овој процес е знак за силната заложба на Европската Унија кон Македонија и Албанија и дека очекува оваа фаза да заврши до следното лето за првата меѓувладина конференција да се одржи наесен во 2019 година, со што и официјално треба да започнат преговорите за членство со ЕУ.
Хан исто така кажа дека самиот процес е од интерес на граѓаните и ги унапредува нивните услови за живеење – владеењето на правото, стабилизација на економијата и привлекување на инвеститори кои ќе отворат нови работни места, и на кој начин „одливот на мозоци“ ќе се замени со циркулација на работната сила.
Според него, за граѓаните не е интересно колку поглавја се отворени, и дека треба да се најде јазик за да се допре до граѓаните.
Тој посочи дека овој проблем кој е забележителен и земјите кои се во понапредна фаза од процесот, е што луѓето гледаат на ЕУ како на некој кој постојано бара реформи и укажа на потребата од објаснување пред луѓето на позитивните резултати и влијанието кое самиот процес го има врз нивните живот, а не само влијанието кое ќе го има крајната цел, пристапувањето.
Хан потенцираше дека сака да го заврши својот мандат следната година со јасен сигнал дека дека се отворени поглавјата со Македонија и кажа дека ќе ги вложи сите напори за тоа.