Германската полиција потврди дека во близина на стадионот на Борусија Дортмунд е фрлена експлозивна направа, една од трите што одекнаа во градот вечерва како што јавуваат тамошните медиуми. Притоа е оштетен и клупскиот автобус на „милионерите“, а со полесни повреди се здобил Марк Бартра кој моментно се наоѓа во болница и во добра состојба. Мечот меѓу бундеслигашот и Монако е одложен за утре со почетокот во 18,45 часот.
Во меѓувреме се јави и Бартра. Шпанскиот фудбалер е амбулантски хоспитализиран со расекотини на раката како последица од оштетеното стакло на автобусот. Ќе добие неколку конци, но порача дека се чувствува добро. Играчите на Борусија се повлечени на сигурно место додека полицијата трага по напаѓачите и истражува дали нападот бил планиран или не.
„Експлодира бомба во близина на клупскиот автобус кај нашиот хотел. Играчите се на сигурно“, порачаа од клубот од Дортмунд. Навивачите, пак, во паника ја следат ситуација преку социјалните мрежи во страв од можни нови напади.