Економските последици од руско-украинскиот конфликт и инфраструктурните проекти во Северна Македонија биле теми на разговор за време на денешната средба помеѓу амбасадорката на САД, Кејт Мари Брнз и Министерот за економија Крешник Бектеши.
Во рамките на состанокот министерот ги презентирал реализираните проекти и планираните активности во делот на енергетиката, трговијата, иновациите, поддршката на странските инвеститори.
„Министерот Бектеши ја информираше амбасадорката за сетот од 26 мерки кој што го донесе Владата за поддршка на економијата и истакна дека со голема внимателност се следи ситуацијата, пред се во делот на цените на енергенсите за што се развиваат сценарија за можни исходи. Тој ја изрази својата благодарност до Владата на САД како наш главен стратешки партнер, којашто постојано и дава значајна поддршка на нашата Влада во спроведувањето на активностите насочени кон економски раст и стабилност на земјата“, се вели во соопштението од Министерството за економија.
Соговорниците договориле дека треба да продолжи економската соработка меѓу двете земји со посебен акцент на поттикнување на проекти и инвестиции кои ќе овозможат трајна и одржлива енергетска независност на Северна Македонија.
На средбата била упатена благодарност за поддршката на Северна Македонија, која како НАТО сојузник, се приклучи кон повикот за запирање на воените дејствија во Украина.