Луис Енрике го призна поразот од ПСЖ, призна дека француската екипа беше подобра од неговата во Париз и презема одговорност за дебаклот на „Паркот на принцевите“. Барселона загуби со 4:0 и пред елиминација е во осминафиналето во Лигата на шампиони и покрај реваншот на „Камп Ноу“.
„Ова беше вечер на катастрофа. Беа подобри и со топка и без неа. Мислам дека нема потреба премногу да објаснувам. Беа подобри и тоа е тоа“, рече Луис Енрике по еден од најтешките порази на Каталонците во ЛШ.
На критичките прашања на прес-конференцијата по средбата не реагираше баш најдобро.
„Фудбалот е страсна игра што понекогаш носи и компликации. Ова што се случи е моа одговорност. Ако критикувате некого, критикувајте ме мене. Пред неколку денови или недели овие исти играчи беа добри бидејќи победуваа“, продолжи тренерот на Барса.
Секој има право на лош ден, но овојпат, се чини, во сплетот на околности се вклопи и промена на формацијата на Енрике од 4-3-3 во 4-2-3-1 за што е свесен дека ја промаши.
„Се префрливме на 4-2-3-1 за Меси да може да игра повеќе со топка. Нема да трошиме премногу време на објаснување. Само сака, вие новинарите да имате ист став и кога победуваме и кога губиме“, заклучи Енрике.
И играчите се свесни дека не одиграа ништо во Париз. Го призна тоа Серхио Бускетс во име на своите колеги.
„Беа подобри од нас. Играа подобро. Тактички беа подобри и физички посилни“, резимира во кратки црти шпанскиот репрезентативец во екипата на Барселона.