Црна Гора издржа само полувреме во една од трите балканските пресметки во групата А на 14. Европско првенство во ракомет што започна денеска во коорганизација на Шведска, Норвешка и Австрија. Негативата од еден гол по првите 30 минути во Грац, Хрватска ја претвори во триумф со шест гола на крајот со 27:21 (полувреме 12:13) за оправдување на улогата на фаворит во мечот.
По седум гол во натпреварот постигнаа Лука Циндриќ за Хрватска и Никола Грбовиќ за Црна Гора. Но, Циндриќ имаше поддршка од Хорват и Мариќ кои реализраа по четири пати, за разлика од Грбовиќ кој немаше такво растоварување во нападот.
Белорусија, пак, во увертира на групната фаза во Грац ја совлада Србија со 35:30 (16:15). На поразот на српските ракометари им кумуваа лошата игра во одбрана, особено во вториот дел, и неколкуте неискористени зицери, па самокритичноста дојде како логична последица по натпреварот.
Најефикасен на теренот беше Каралек со девет гола, по пет за победничката селекција додадоа Кулеш и Шилович. Прв стрелец во српската репрезентација беше Радивоевиќ со шест гола, пет даде Сретеновиќ, по четири запишаа Зеленовиќ и Вуиќ.
Шпанија и Германија не дозволија изненадување во групата Ц и со победи по 11 гола разлика ги започнаа настапите во Трондхајм. „Фуријата“ во воведниот меч беше подобра од Летонија со 33:22 (14:11), а „панцерите“ од Холандија со 34:23 (15:13).
Петок е резервиран за мечевите од првото коло во групите Б, Д, Е и Ф. Премиера на турнирот ќе има и македонската репрезентација која од 20.30 часот во Виена ќе игра против Украина.
ЕП во ракомет (м)
Група А
Хрватска – Црна Гора 27:21 (12:13)
Белорусија – Србија 35:30 (16:15)
Група Ц
Шпанија – Летонија 33:22 (14:11)
Германија – Холандија 34:23 (15:13)