Доколку продолжи занемарување на демократијата во Унгарија, Европската унија може да ја разгледа опцијата и да ја активира процедурата според членот 7 од Договорот за ЕУ, со кој се предвидуваат санкции против една земја-членка, предупреди портпаролот на Европската народна партија, Зигфрид Муресан.
Унгарија неделава се најде под жесток притисок поради донесувањето на закон чија директна цел е Централно европскиот универзитет (ЦЕУ) основан од американскиот милијардер, Џорџ Сорос, и кој од одамна се смета за непријателски бастион на либерализмот од страна на владата на премиерот Виктор Орбан.
Овој потег на Будимпешта предизвика обединет бран на осуда во Европскиот Парламент, при што претседателот на Европската народна партија Манфред Вебер истакна, дека “слободата на размислување, истражувања и на говорот се од суштинско значење за европскиот идентитет“.
-Европската народна партија ќе го брани ова по секоја цена, рече тој.
Претставници на партијата се најдоа под притисок да ја осудат партија на Орбан Фидес, која е сродна на централно-десничарската група на Европската народна партија.
Портпаролот на Европската народна партија и романски европратеник Зигфрид Муресан за Јурактив изјави дека партиските лидери ќе разговараат за случајот со Фидес на состанокот на претседателството на 29 април.
Но тој рече дека дека како опција остануваат и санкциите против Будимпешта.
-Ако ситуацијата со Унгарија продолжи, Член 7 може да се стави на маса, предупреди тој.
Членот 7 од Договорот од Лисабон, кој досега не бил активиран е наменет за одбрана на основните вредности на ЕУ, како што се демократијата, слободата, човековите права и владеењето на правото. Доколку ЕУ забележи “сериозни и постојани прекршувања” на овие вредности, може да се активира Членот 7 и со тоа да се суспендираат правата како земја членка, како што се право на глас во Советот на ЕУ или пристап до единствениот пазар.
Сепак, бидејќи овој Член 7 се смета како “нуклеарна бомба” – алатка што никогаш не треба да се користи – ЕУ воведе механизам “владеење на правото”, кој во моментов се применува за Полска.
Муресан смета дека вистинското прашање што треба да им се постави на граѓаните на Унгарија е дали сакаат да продолжат да ги уживаат бенефитите на членството во ЕУ што тоа им ги пружа, вклучувајќи го и правото да живеат каде сакаат во Европа, слободно да патуваат, да работат и да студираат каде сакаат и многу милијарди евра од ЕУ фондовите.
Портпаролот на Европската народна партија додаде дека повеќе од десет години откако Унгарија се приклучи на ЕУ, сега е време за целосно да учествува во дебатата за иднината на Европа.
-Она што луѓето сакаат е политичарите да спроведуваат реформи во Европа, така што таа ќе може да ги реши нивните проблеми, вели Муресан.
Унгарија последните неколку дена предизвика голем број провокации со започнувањето на иницијативата наречена ” Да го запреме Брисел”, која започна само неколку дена откако лидерите се собраа во Рим по повод 60-годишнината од ЕУ.
Претседателот на Европската комисија Жан-Клод Јункер вчера истакна дека не му се допаѓа одлуката за затворањето на Универзитетот, додавајќи дека следната среда за ова ќе се разговараат комесарите.
Иницијативата “Да го запреме Брисел“, тој ја нарече пристрасна, додавајќи дека „би сакал да може подобро да ги разбере намерите на Орбан“.