Нова посета на турскиот претседател Реџеп Таип Ердоган на САД, и нов инцидент.
Инцидентот се случи за време на говорот на Ердоган вчера попладне во хотелот Мериот во Њујорк, два дена по неговото обраќање на Генералното собрание на ОН.
Среде говорот на Ердоган, момче во публиката стана и го прекина говорот со извици „Ти си терорист! Губи се од мојата земја!“, по што дојде до општа турканица во салата.
Бројните поддржувачи на Ердоган почнаа да го скандираат неговото име за да ги неутрализираат извиците на демонстрантите.
Обезбедувањето потоа почна насилно да ги исфрла демонстрантите, дел од кои се најдоа на земја. Додека ги влечеа од салата, поддржувачите на Ердоган ги удираа. Не се знае дали за обезбедувањето била задолжена американската тајна служба, личните телохранители на Ердоган или хотелското обезбедување.
Меган Бодет, една од шесте демонстранти, која на протестот го развиори знамето на женското крило на ИПГ, за Њујорк тајмс изјави дека нивната цел била „да го привлечат вниманието на злосторствата на турската држава и кршењето на човековите права на курдскиот народ во Турција и Сирија“.
При последната посета на Ердоган на САД во мај неговите телохранители се пресметаа со демонстранти во Вашингтон, додека турскиот претседател сето тоа го следаше од службениот автомобил.