Турција нема да им се предаде на САД, изјави денес турскиот претседател Реџеп Таип Ердоган на конгрес на неговата исламо-конзервативна партија АКП:
– Нема да им се предадеме на оние што се претставуваат како наши стратешки партнери а истовремено од нас прават стратешка цел, рече тој.
Со оваа изјава тој даде сигнал дека ја продлабочува кризата со САД која Турција ја чини вртоглав пад на турската лира од 40 отсто.
– Некои мислат дека можат да ни се закануваат со економијата, санкции, девизи, камати и инфлација. Ние ги откривме вашите сплетки и ве предизвикуваме, изјави тој со енергијата позната од неговите митинзи.
Дипломатската криза помеѓу Анкара и САД, кои се сојузници во НАТО, започна со затворањето на американски свештеник Ендру Бренсон, уапсен во декември 2016 година, а неодамна префрлен во домашен притвор. Тој ги негира обвинувањата дека ѝ помагал на групата која Анкара ја обвинува за обид за државен удар, и оти им пружал поддршка на курдските екстремисти.
На одбивањето за ослободување на свештеникот, САД одговорија со санкции против двајца турски министри.
Турската лира продолжува да паѓа откако Вашингтон во петокот се закани со нови санкции. На падот на лирата влијае и контролата на Ердоган врз турската економија и неговото одбивање да и дозволи на централната банка на Турција да ги зголеми каматите.
Агенцијата „Стандард енд Пурс“ го намали кредитниот рејтинг на Турција на „Б плус“ наведувајќи дека падот на вредноста на лирата ќе доведе до послаба економија следната година.
На денешниот конгрес Ердоган тврдеше дека Турција ќе продолжи да го проширува своите воени операции на границата со Сирија за да го сопре напредувањето на курдската милиција која, од друга страна, на има поддршката на САД во борбата против тероризмот. За Ердоган овие Курди се терористи.